Brighton College директори Ўзбекистондаги Ислом цивилизацияси марказининг маърифий аҳамиятини эътироф этди
Тарихий мероснинг ҳақиқий қиймати уни сақлаш билангина эмас, балки у орқали янги билимларни кашф этиш, илмий тафаккурни ривожлантириш ва келажак авлодга мустаҳкам маънавий замин яратиш билан ҳам белгиланади. Ўзбекистон Республикаси Президенти Шавкат Мирзиёев ташаббуси билан барпо этилган Ўзбекистондаги Ислом цивилизацияси маркази ана шу мақсадларни ўзида мужассам этган йирик илмий-маърифий маскандир.
Ўзбекистоннинг тарихий мероси, илмий анъаналари ва замонавий музей тажрибаси Британиядаги Brighton College директори Стив Маршалл-Тейлорнинг эътиборини тортди. Ўзбекистондаги Ислом цивилизацияси маркази экспозициялари билан танишган меҳмон Марказнинг ўтмиш, бугун ва келажакни ўзаро боғловчи ғоясини, айниқса, Қуръони каримга бағишланган экспозицияни алоҳида эътироф этди.
Марказ экспозициялари билан танишар экан, Стив Маршалл-Тейлор унинг меъморий ечими, мазмунан бойлиги ва ташриф буюрувчиларда янги билимларга қизиқиш уйғотиш имкониятига эътибор қаратди. Унинг фикрича, бу ерда Ўзбекистон тарихини нафақат ўрганиш, балки мамлакатнинг бугунги қиёфаси ва келажакка интилишларини ҳам чуқурроқ англаш мумкин.
Brighton College директори, айниқса, Марказ кириш қисмида ифодаланган ўтмиш, бугун ва келажак ўртасидаги узвий боғлиқлик ғоясини юқори баҳолади. Унинг таъкидлашича, бундай ёндашув ташриф буюрувчиларга Ўзбекистоннинг тарихий йўлини яхлит тасаввур қилиш ва унинг бугунги тараққиётини чуқурроқ англаш имконини беради. Меҳмоннинг эътиборини тортган энг муҳим экспозициялардан бири Қуръони каримга бағишланган бўлди. У бу ердаги тажриба ўзи учун мутлақо янги бўлганини таъкидлади.
«Бу ерда олган таассуротларимни сўз билан ифодалаш жуда қийин. Марказ ўта даражада гўзал ва бетакрор. У инсонга илҳом бағишлайди, билим беради. Бу ерда жуда кўп янги маълумотларга эга бўлдим.
Менимча, бу маскан одамларга Ўзбекистон тарихини ва бугунги қиёфасини чуқурроқ англашга ёрдам беради. Бу эса биргаликда порлоқ келажакни барпо этиш учун замин яратади.
Мен учун энг унутилмас лаҳзалардан бири Қуръони карим билан боғлиқ экспозиция бўлди. Бу ердаги тажрибани аввал ҳеч қачон бошдан кечирмаганман. У ҳақиқатан ҳам ҳайратланарли.
Менимча, бу марказга нафақат ёшлар, балки барча ташриф буюриши керак. Айниқса, ёшлар бу ерда янги билимларни кашф этиш, дунёқарашини бойитиш ва илҳом олиш имконига эга бўлади. Бу маскан ҳар бир инсон учун ўзига хос маърифий тажриба тақдим этадиСтив Маршалл-Тейлор Марказнинг барча ёшдаги ташриф буюрувчилар учун аҳамиятига ҳам алоҳида тўхталди. Унинг фикрича, айниқса, ёшлар бу ерда янги билимларни ўзлаштириш, дунёқарашини кенгайтириш ва илҳом олиш имконига эга, — дея таъкидлади Brighton College директори.
