Марказий Осиё ва Озарбайжон ёш етакчилари умумий тарихга янги нигоҳ ташлади
Ўзбекистондаги Ислом цивилизацияси марказига ташриф буюрган минтақанинг ёш етакчилари умумий цивилизациявий меросни замонавий технологиялар орқали ўрганиш, тарихий илдизларни чуқурроқ англаш ва бу билимларни ўз мамлакатларидаги тенгдошларига етказиш муҳимлигини таъкидлади. «Марказий Осиё + Озарбайжон ёш етакчилари» дастури доирасидаги учрашув тарихий мероснинг нафақат ўтмиш ҳақидаги хотира, балки халқларни яқинлаштирадиган ва келажак ҳамкорлигига замин яратадиган умумий бойлик эканини намоён этди.
«Марказий Осиё + Озарбайжон ёш етакчилари» минтақавий дастури доирасида Ўзбекистонда бўлиб турган иштирокчилар Тошкентдаги Ислом цивилизацияси марказига ташриф буюрди.
Меҳмонлар Марказ экспозициялари орқали Ўзбекистоннинг бой тарихий, илмий ва маънавий мероси, Марказий Осиёда ислом цивилизациясининг шаклланиши ва тараққиёти ҳамда буюк алломаларнинг жаҳон илм-фанига қўшган ҳиссаси билан танишди.
Ташриф давомида халқлар ўртасида асрлар давомида шаклланган илмий-маданий алоқалар, тарихий ёдгорликлар ва нодир экспонатлар ҳақида маълумот берилди.
Айниқса, экспозицияларда рақамли тасвирлар, интерактив ечимлар ва сунъий интеллект технологияларидан фойдаланилгани иштирокчилар эътиборини тортди. Меҳмонлар тарихий маълумотларни фақат ўқиш ёки экспонатларни томоша қилиш билан чекланмай, турли даврлар муҳитини замонавий технологиялар орқали ҳис этиш имкониятига эга бўлди.
«Иккинчи марта келяпман, яна янги билимлар оляпман»
Айсиман Қулиева, Озарбайжоннинг «ASAN Könüllüləri» ташкилоти раиси:
«Ҳар бир тарихий давр ва босқич жуда батафсил, тушунарли тарзда ёритилган. Бу ерда янги билимларга эга бўляпман. Марказнинг инновацион ёндашув асосида барпо этилгани ҳам алоҳида эътиборга молик.
Айниқса, кичик туйнук орқали ғор давридаги инсонларнинг кундалик ҳаётини кўриш, миллий чолғу асбоблари садоларини тинглаш имконияти жуда қизиқарли. Туркий давлат вакили сифатида ушбу дин ва цивилизациянинг ривожланишини кўриш, уни яқиндан англаш мен учун жуда ёқимли туйғу».
Самолётда журнал ўқиб бошланган қизиқиш
Динара Садвакасова, Қозоғистонлик иштирокчи:
«Ҳар сафар тасодифлар тасодиф эмаслигига яна бир бор амин бўламан. Остонадан учиб келаётганимизда самолётдаги журналда ушбу Марказ ҳақида мақолани ўқидим. Унинг кўлами ва экспонатлари, жумладан, икки минг йилдан ортиқ тарихга эга гилам ҳақидаги маълумотлар менда катта қизиқиш уйғотди.
Ўшанда Марказга ташриф буюришни жуда хоҳлагандим. Дастур ташкилотчилари бу ташрифни ҳам назарда тутганидан миннатдорман.
Марказ архитектураси, мазмуни, экспонатлари, тарих ва замонавий технологияларнинг ўзаро уйғунлиги билан ҳайратлантиради. Бу ердаги муҳит ўтмишга чуқурроқ кириб бориш ва гўё ўша даврларнинг жонли гувоҳига айланиш имконини беради».
«Экспонатларни томоша қилиш билан чекланмайсиз, тарихни ҳис этасиз»
Қирғизистонлик ёш етакчилар ҳам Ислом цивилизацияси марказининг меъморий қиёфаси, бадиий безаги ва интерактив имкониятларига юқори баҳо берди.
Жогорку Кенеш ҳузуридаги Ёш кадрлар мактаби иштирокчиси Айканиш Асранқулова мажмуа экспозициялари тарихий маълумотларни етказиш билан бирга, ташриф буюрувчиларга ўтмиш муҳитини тасаввур қилиш имконини беришини таъкидлади.
«Марказ ташқи кўринишиданоқ катта таассурот қолдиради. Ичкарига кирганингизда эса ўзингизни бутунлай бошқа муҳитда ҳис қиласиз.
Бу ердаги экспонатларни шунчаки томоша қилибгина қолмай, улар орқали тарихни ҳис этиш мумкин. Марказда ҳар бир майда тафсилотгача эътибор қаратилган, тарихий мерос замонавий ёндашувлар билан уйғунлаштирилган. Бу жуда юқори даражада амалга оширилган».
«Учинчи марта келдим, ҳар сафар янги нарса кашф этаман»
Ўш шаҳри ҳокимияти вакили Максатбек Осмоналиев эса Ислом цивилизацияси марказига учинчи марта келганини маълум қилди.
Унинг айтишича, ҳар бир ташриф давомида экспозициялардан янги маълумотлар олиш, илгари эътибор бермаган жиҳатларини кашф этиш имконияти пайдо бўлмоқда.
«Ҳар сафар келганимда янги нарсаларни кўраман. Экспонатлар сони янада кўпайиб, Марказ ёшлар учун янада қизиқарли масканга айланишини тилайман», — деди у.
Марказий Осиё ва Озарбайжон ёш етакчилари ўз мамлакатларидаги бошқа ёш етакчиларни ҳам Марказга ташриф буюришга таклиф этиш ниятида эканини билдирди.
Бу каби учрашувлар ёшларнинг бир-бирининг тарихи ва маданияти ҳақидаги билимларини бойитиш, минтақавий мулоқотни кенгайтириш ҳамда умумий цивилизациявий меросни англашга хизмат қилади.
