Янгиликлар

Ягона мақсад йўлида 800+ лойиҳа: махсус фильм ва роликлар суратга олинади

Ўзбекистондаги Ислом цивилизацияси марказида махсус фильмлар ва роликлар суратга олиш жараёнларига бағишланган йиғилиш бўлиб ўтди.

Унда марказ раҳбари Фирдавс Абдухолиқов, Кинематография агентлиги масъуллари, Миллий кинематографияни ривожлантириш маркази директори Фурқат Усмонов, “Ҳужжатли ва хроникал фильмлар киностудияси” вакиллари иштирок этди.

Йиғилишда махсус фильмларни ва роликларни суратга олишда нималарга аҳамият бериш зарурлиги айтиб ўтилди. Ўзбекистон анимация студиялари ассоциацияси раҳбари Абдулатиф Ҳайдаров ўзининг болалар учун махсус лойиҳаларини тақдимот қилди. Фикр-мулоҳазалар билдирилди. Янги ишланадиган анимацион маҳсулотлар учун таклифлар билдирилди. Ижодий жамоага қўшимча ғоялар тақдим этилди.

"Фильмларда кеча, бугун, эртага рангдор ва жозибадор гавдаланиши керак. Киноижодкорлардан энг сўнгги технологиялардан ва салоҳиятли кадрлардан фойдаланиш сўралади. Марказда болалар учун инновацион майдон бўлади. Ана шу ерни муносиб контент билан тўлдириш анимация усталари зиммасига юкланади. Улар болалар учун қисқа ва лўнда роликлар, алломалар ва уларнинг илм-фанга қўшган ҳиссаларини содда ва равон тилда тушунтириб берадиган маҳсулотлар ишлаб чиқариши керак. Бунда шунчалик пухта ёндашиш керакки, марказга ташриф буюрган болалар билим олиб кетсин. Алломалар ҳаётига қизиқиш уйғонсин ва уйларига қайтганда алломалар ҳаётини мустақил ўргансин, уларга муносиб бўлиш ҳисси пайдо бўлсин", — Фирдавс Абдухолиқов.

Йиғилишда марказ экспозицияси учун ҳужжатли фильмлар тайёрлаш, уларни замонавий медиа контентлар асосида бойитиш, тарғибот салоҳиятини ошириш таклифлари билдирилди. 800 дан ортиқ лойиҳалар мавзулар кесимида бўлиб олинди. Шунингдек, Ўзбекистондаги Ислом цивилизацияси маркази ва Самарқандда бунёд этилаётган Имом Бухорий мажмуалари ҳақида кенг қамровли фильм олишга келишиб олинди.