Янгиликлар

Огаҳий – ХIХ асрда яшаб ўтган йирик шоир, тарихнавис, давлат арбоби ва жадидчилик ғоялари билан уйғунлашган маънавий уйғониш даврининг юксак намояндаларидан бири ҳисобланади. Унинг асарлари ўз замонаси ижтимоий-сиёсий ҳаёти, маданияти ва адабий муҳитини чуқур акс эттиради. Шу боис Огаҳийнинг ҳаёти ва фаолиятини ўрганиш нафақат адабиётшунослик, балки тарих, фалсафа, шарқшунослик ва бошқа фанлар кесимида ҳам муҳим аҳамият касб этади.

Ўзбекистондаги Ислом цивилизацияси маркази томонидан миллий маданий меросимизни кенг тарғиб қилиш ва тарихий шахсларимизнинг илмий-ижодий фаолиятини чуқур ўрганиш мақсадида “Муҳаммадризо Огаҳий” медиалойиҳаси тайёрланиши режалаштирилмоқда. Ушбу лойиҳа орқали Марказ экспозицияси янада бойитилиб, зиёратчилар ва тадқиқотчилар учун янги, мазмунли контентлар тақдим этилиши кўзда тутилган.

Медиалойиҳа доирасида Муҳаммадризо Огаҳийнинг илмий-ижодий мероси чуқур таҳлил этилади. Натижада илмий ишланмалар тайёрланади, турли интерактив контентлар яратилади ва улар Ислом цивилизацияси марказининг доимий экспозициясига интеграция қилинади.

Лойиҳада Огаҳийнинг қўлёзмалари, тарихий ҳужжатлар, манбаларга асосланган илмий изоҳлар, шунингдек, визуал материаллар ва видеороликлар ишлаб чиқилиши кутилмоқда. Бу эса нафақат ташриф буюрувчиларга, балки ёш тадқиқотчилар, талабалар ва кенг жамоатчиликка ҳам кенг имкониятлар яратади.