Махсус штаб: ҳозиргача диний-маърифий йўналишда 14 та лойиҳа учун техник топшириқлар тайёрланган
Ўзбекистондаги Ислом цивилизацияси маркази томонидан музей экспозициясини бойитиш, диний-маънавий меросни тарғиб қилиш ва ёш авлодни илм-маърифатга йўналтириш мақсадида амалга оширилаётган махсус лойиҳалар юзасидан штаб йиғилиши бўлиб ўтди.
Йиғилиш давомида диний-маърифий йўналишда режалаштирилган жами 26 та лойиҳа муҳокама қилинди. Ушбу ташаббуслар 8 та ҳамкор ташкилот билан биргаликда босқичма-босқич амалга оширилади. Хусусан:
- 1 босқичда – 18 та лойиҳа;
- 2 босқичда – 2 та лойиҳа;
- 3 босқичда – 5 та лойиҳа татбиқ этилиши кўзда тутилган.
Муҳокамалар жараёнида лойиҳа ижрочилари ҳамда илмий-ижодий гуруҳ аъзолари иштирокида бўлиб ўтган ушбу йиғилишда тегишли баённомалар расмийлаштирилди.
Мазкур лойиҳалар Ўзбекистон Республикаси Дин ишлари бўйича қўмитаси, Ҳадис илми мактаби, Имом Бухорий халқаро илмий-тадқиқот маркази, Имом Мотуридий халқаро илмий-тадқиқот маркази, Имом Термизий халқаро илмий-тадқиқот маркази, Ўзбекистон халқаро ислом академияси ва Тошкент ислом институти билан ҳамкорликда амалга оширилади.
Ислом цивилизацияси маркази томонидан илгари сурилаётган бу лойиҳалар тарихий ҳақиқатларни ёритиш, ислом илм-фани ва маданиятининг улкан меросини кенг жамоатчиликка етказиш, айниқса ёшлар қалбида илм ва маърифатга бўлган қизиқишни кучайтириш йўлида муҳим қадамлардан биридир.