Қуръон зали концепциясини янада мукаммаллаштириш масалалари кўриб чиқилди
Ўзбекистондаги Ислом цивилизацияси маркази штабида Қуръон зали экспозициясини ташкил этиш бўйича навбатдаги муҳокама йиғилиши бўлиб ўтди.
Унда Президент Шавкат Мирзиёев ташаббуси билан бунёд этилаётган ушбу Марказнинг энг муҳим бўлимларидан бири – Қуръони карим зали концепциясини янада мукаммаллаштириш, унинг таркибий қисмларини бойитиш ва ташкил этиш масалалари кўриб чиқилди. Қуръон карим зали учун танланган экспонатларни тоифаларга ажратиш, биринчи тоифага кирувчи лойиҳаларнинг техник топшириқларини тайёрлаш, шунингдек, айрим экспонатларни экспозицияга киритиш ёки киритмаслик масалалари атрофлича таҳлил қилинди.
Шунингдек, йиғилиш давомида Қуръон зали экспозициясида мультимедиа маҳсулотларидан фойдаланиш имкониятлари, интерактив ёндашувлар орқали меҳмонларга Қуръон тарихини замонавий шаклда етказиш имкониятлари ҳам муҳокама қилинди. Мазкур экспозиция Ўзбекистоннинг бой диний-маданий меросини кенг жамоатчиликка танитишда муҳим қадам бўлиши кутилмоқда.
Маълумот ўрнида таъкидлаш жоизки, Қуръон залида Ўзбекистонга алоқадор 114 та ноёб Қуръон қўлёзмаси жамланади. Улар орасида Ҳазрати Усмон Қуръони, VIII асрга оид Катта Лангар Қуръони, ҳамда турли тарихий сулолалар даврида юртимизда яратилган ёки асраб келинаётган бетакрор нусхалар мавжуд.