Янгиликлар

Қатарнинг нуфузли «Gulf Times» газетасида Ўзбекистонда барпо этилган Ислом цивилизацияси маркази ҳамда Соҳибқирон Амир Темурнинг маънавий меросига бағишланган таҳлилий мақола чоп этилди, деб хабар бермоқда «Дунё» АА мухбири.

«Амир Темур мероси Ислом цивилизацияси марказида: Учинчи Ренессанснинг интеллектуал асоси» сарлавҳали материалда Марказнинг нафақат минтақа, балки глобал ислом цивилизациясидаги ўрни таҳлил қилинган.

Мақолада асосий урғу Соҳибқирон Амир Темур шахсиятига қаратилган. Таъкидланишича, Темурийлар давридаги илм-фан, маданият ва меъморчилик тараққиёти бугун Ўзбекистонда пойдевори қўйилаётган Учинчи Ренессанс учун асосий маънавий манба бўлиб хизмат қилмоқда.

«Бугун Тошкентда қад ростлаган Ислом цивилизацияси маркази — Амир Темур томонидан асос солинган буюк давлатчилик ва илм-фан анъаналарининг замонавий кўринишидир. Марказ Соҳибқироннинг ЪКуч — адолатдадирʼ деган тамойилини интеллектуал салоҳият билан бойитиб, янги давр пойдеворини намоён этмоқда»,

– деб ёзади «Gulf Times».

Нашрнинг қайд этишича, Марказ шунчаки муҳташам бино эмас, балки буюк саркарда ва давлат арбоби Амир Темур давридаги «олтин давр»ни бугунги инновациялар билан боғловчи стратегик маскандир.

«Gulf Times» таҳлилига кўра, Президент Шавкат Мирзиёев ташаббуси билан бунёд этилган ушбу мажмуа Ўзбекистоннинг жаҳон майдонидаги маданий дипломатиясини янги даражага олиб чиқди. Марказнинг улкан гумбази ва ҳар бир нақши Амир Темур даври меъморчилигининг замонавий талқини бўлиб, у илм ва маърифатга интилган аждодлар руҳини акс эттиради.