Янгиликлар

Ўзбекистондаги Ислом цивилизацияси марказига ташриф буюрган Сейшел Республикаси ташқи ишлар ва диаспора вазири Барри Фор 3000 йиллик тарихни қамраб олган экспозициялар билан танишар экан, бу ерда тақдим этилган маданий ва илмий мероснинг замонавий технологиялар орқали жонли тарзда ёритилишига юқори баҳо берди.

Сейшел вазири ўз таассуротларида Марказни юксак эътирофга муносиб лойиҳа сифатида баҳолаб, унинг барпо этилишида Ўзбекистон Республикаси Президенти Шавкат Мирзиёевнинг стратегик қарашлари муҳим аҳамият касб этганини таъкидлади.

“Бу марказ — узоқни кўра олганлик натижаси. Бу ерда бир кун эмас, балки бир неча кун қолиб, цивилизацияни янада чуқурроқ ўрганиш истаги пайдо бўлди,” — деди у.

Мартабали меҳмоннинг айтишича, Марказда намойиш этилган ҳар бир экспонат алоҳида эътиборга лойиқ. Айниқса, тахминан 3000 йил аввал яратилган буғу ҳайкали унда катта ҳайрат уйғотган.

“Қадим замонда бундай санъат асарининг яратилгани мени ҳайратга солди. Уни сақлаб қолганингиз — бу катта ютуқ,” — дея қўшимча қилди вазир.

Ташриф якунида у Фахрий меҳмонлар китобига ўз фикрларини ёзиб қолдирди. Унда Марказ “Ўзбекистон халқига ва бутун дунёга тақдим этилган улкан совға” эканини алоҳида таъкидлади.