Туркия Республикаси Конституциявий суди раиси ниятини очиқлади
Туркия Республикаси Конституциявий суди раиси Қодир Ўзқоянинг таърифича, Ўзбекистондаги Ислом цивилизацияси маркази инсон цивилизациясини бир бутун жараён сифатида акс эттиради.
Қодир Ўзқоя, Туркия Республикаси Конституциявий суди раиси:
Аввало, бу Марказни барпо этишда меҳнат қилган барчага чин дилдан миннатдорлик билдираман. Ҳақиқатан ҳам бу ерда яратилган иншоот жуда муҳташам, ҳар томонлама мукаммал. Бу маскан инсон цивилизациясини бир бутун жараён сифатида акс эттиради. Исломдан олдинги давр ҳам, исломдан кейинги тараққиёт босқичлари ҳам изчил тарзда ёритилган. Бу ерда намойиш этилган экспонатлар, берилган маълумотлар жуда қимматли. Инсон тарихи умумийлиги, цивилизациянинг узвийлиги бу ерда яққол намоён бўлади. Турли даврларда цивилизация ривожида узилишлар бўлган бўлса-да, бу жараёнлар Марказда ягона тарихий занжир сифатида кўрсатилган. Айниқса, муқаддас Қуръони каримнинг қадимий нусхаларини, хусусан, Усмон ибн Аффон томонидан ёзилган мусҳафни кўриш менда янада чуқур ҳиссиёт уйғотди. Бу жуда алоҳида ва унутилмас таассурот бўлди. Бу марказни Тошкентга ташриф буюрган ҳар бир инсон албатта кўриши керак, деб ўйлайман. Келгусида яна кенгроқ вақт ажратиб, барча экспозицияларни батафсил ўрганиш ниятим бор. Агар уч сўз билан айтсам — ажойиб, ажойиб, ажойиб.
Шунингдек, делегация таркибидаги Туркия Конституциявий суди вакили Омер Фаруқ ҳам марказ ҳақидаги фикрлари билан ўртоқлашди:
Омер Фаруқ, Туркия Конституциявий суди вакили:
Марказ яхлит ва пухта ўйланган концепция асосида ташкил этилгани дарҳол сезилади. Бу ерда исломдан олдинги даврдан тортиб, исломдан кейинги тараққиёт босқичларигача бўлган жараёнлар изчил ва мантиқий тарзда ёритилган. Инсон тараққиётининг турли босқичлари аниқ ва тизимли равишда намоён этилгани алоҳида эътиборга лойиқ. Экспонатларнинг барчаси диққатимизни тортди. Айниқса, ҳуқуқшунос сифатида мерос тақсимотига оид тарихий ҳужжатлар менда катта қизиқиш уйғотди. Бу эса Марказнинг нафақат тарихий, балки илмий ва амалий аҳамияти ҳам юқори эканини кўрсатади.
Бўлимлар ҳақида гапирадиган бўлсак, уларнинг ҳар бири юксак савияда ташкил этилган. Шу боис, бирини алоҳида ажратиб кўрсатиш қийин — барчаси ўзига хос ва мазмун жиҳатидан бой.
