Янгиликлар

Малайзия вазири: “Бу марказ таълим учун беқиёс аҳамиятга эга”

Ўзбекистондаги Ислом цивилизацияси марказига ташриф инсонни оддий кузатувчидан ўтмиш ва бугун ўртасидаги узвий боғлиқликни ҳис этувчи мушоҳадичига айлантиради. Бу ерда вақт тушунчаси анъанавий мазмунини йўқотиб, цивилизациялар изчиллиги орқали янги маъно касб этади.

Мазкур таассурот Малайзиянинг Олий таълим вазири доктор Датук Сери Дираджа Замбри Абдул Қодирнинг Марказ экспозициялари билан танишуви давомида яна бир бор ўз тасдиғини топди.

Датук Сери Дираджа Замбри Абдул Қодир, Малайзиянинг Олий таълим вазири:

– Аввало таъкидлашни истардимки, бу Марказ — Ўзбекистон ҳукумати томонидан амалга оширилган улкан ва узоқни кўзлаган ташаббусдир. Бу ерда яратилган муҳит ва тақдим этилган бойликлар ҳар қандай ташриф буюрувчида чуқур таассурот қолдиради. Мен кўрганларимдан чин маънода ҳайратдаман.

Энг муҳим жиҳатлардан бири — ислом цивилизациясининг ушбу ҳудуддаги тарихи изчил ва таъсирчан тарзда ёритилганидир. Бу нафақат ўтмишни англаш, балки уни келажак авлодга етказиш нуқтаи назаридан ҳам беқиёс аҳамиятга эга.

Бу марказнинг таълимий қиймати айниқса юксак. Чунки цивилизацияни ўрганиш орқали инсон халқлар ва давлатларнинг асрлар давомида қандай ривожланганини англайди. Бу ерда эса Марказий Осиё, хусусан Ўзбекистон заминидан етишиб чиққан буюк алломалар ва олимлар мероси ёрқин намоён этилган.

Мен Ўзбекистон раҳбариятини шундай юксак даражадаги Ислом цивилизацияси музейини барпо этгани муносабати билан самимий табриклайман. Бу ташриф менда унутилмас таассурот қолдирди.

Маълумот учун: Жорий йилнинг 5 май куни Ўзбекистондаги Ислом цивилизацияси марказида Малайзия Қироличаси иштирокида “Ислом цивилизациясида илмий анъана: манбалар, долзарб масалалар ва салоҳият» мавзусида халқаро илмий-амалий конференция ўтказилди.