“Бу ерга албатта яна қайтамиз” – Австрия вазирларининг Ислом цивилизацияси марказига ташрифи
Австрия Европа ва Халқаро Ишлар Вазири Беате Майнил-Рейсингер ҳамда Австрия Ички Ишлар Вазири Герхард Карнер делегацияси Ўзбекистон Республикаси Ташқи Ишлар Вазири Бахтиёр Саидов ва Ички Ишлар Вазири Азиз Тошпўлатов ҳамроҳлигида Ўзбекистондаги Ислом цивилизацияси марказига ташриф буюрди.
Ташриф давомида меҳмонлар Марказнинг Исломдан аввалги давр бўлими билан яқиндан танишдилар. Айниқса, Бақтрия цивилизациясига оид тақинчоқлар, Кушон даври тангалари ҳамда ер юзидаги энг қадимий шахмат доналари меҳмонларда катта қизиқиш уйғотди.
Хусусан, юртимиз ҳудудидаги Далварзинтепадан топилган шахмат доналари дунёдаги энг қадимий бундай топилмалардан бири экани таъкидланди. Мутахассислар ушбу доналар Ҳиндистондан топилган шахмат намуналаридан қарийб тўрт аср олдин яратилганини аниқлагани меҳмонлар эътиборини тортди.
Биринчи Ренессанс бўлимида эса салжуқийлар даврига оид ноёб заргарлик буюмлари ва икки бошли бургут тасвири туширилган давлат туғроси меҳмонларда катта таассурот қолдирди.
Шунингдек, Иккинчи Ренессанс бўлимидаги Бибихоним сиймоси алоҳида диққат марказида бўлди. Таъкидлаш жоизки, ушбу қиёфани яратишда, аввало, Ўзбекистон Республикаси Президентининг тавсиялари асос қилиб олинган. Давлатимиз раҳбари Бибихонимнинг бош кийими, либос ранглари ва бўй-басти айнан испан элчиси Руи Гонсалес де Клавихо тасвирлаган тарихий манбаларга мос бўлиши лозимлигини таъкидлаган эдилар. Мазкур мум ҳайкал ана шу тарихий тавсифлар асосида яратилган.
Меҳмонлар Янги Ўзбекистон — янги Ренессанс пойдевори бўлимидаги дарахт инсталляцияси ҳамда Қуръони Карим залидаги ноёб экспозицияларни томоша қилиб, юксак ҳайрат ва таассуротларини изҳор этдилар.
Беате Майнил-Рейсингер, Австрия Европа ва Халқаро Ишлар Вазири:
“Бу ерда бўлиш имконига эга бўлганимиздан жуда мамнунмиз ва бу биз учун катта шараф. Мен ҳаётимда ҳеч қачон бундай буюк нарсани кўрмаганман. Ислом цивилизацияси марказида Австрияга тегишли бир қисмининг мавжудлиги бизни янада фахрлантиради, шунинг учун марказни табриклайман”.
Герхард Карнер, Австрия Ички Ишлар Вазири:
“Марказда кўрган барча экспозициялар биз учун катта таъсир қолдирди ва биз албатта яна қайтиб келамиз”.
Ташриф сўнгида Австрия Федерал ташқи ишлар вазири Беате Майнл-Райзингер ҳамда Австрия Федерал ички ишлар вазири Герхард Карнер Марказнинг Фахрий меҳмонлар китобига ўз дастхатларини қолдирдилар.
