Янгиликлар

Жорий йил 5 май куни Ўзбекистондаги Ислом цивилизацияси марказида “Ислом цивилизациясида илмий анъана: манбалар, имкониятлар ва долзарб масалалар” мавзусида халқаро илмий-амалий конференция бўлиб ўтди.

Ушбу анжуман ислом илмий меросини ўрганиш, унинг замонавий илм-фан билан боғлиқлигини таҳлил қилиш ҳамда халқаро илмий ҳамкорликни кенгайтиришга қаратилгани билан алоҳида аҳамият касб этди.

Ўзбекистондаги Ислом цивилизацияси маркази бош илмий ходими Зоҳидулла Мунавваров Жанубий-Шарқий Осиё мамлакатлари, хусусан Малайзияда исломий ва илмий анъаналар шаклланиши тарихий жиҳатдан бевосита Марказий Осиё, жумладан Ўзбекистон ҳудуди билан боғлиқлигини таъкидлади.

“Жанубий-Шарқий Осиё мамлакатлари, жумладан Малайзияда исломий ва илмий анъаналар шаклланиши бизнинг юртимиз билан бевосита боғлиқ. Тарихий миграция ва кўчиш жараёнлари натижасида Ислом дини илк даврларданоқ ушбу ҳудудларга кириб борган бўлиб, шу жараён орқали илмий-маърифий анъаналар ҳам у ерларга етиб борган.

Бугунги кунда Малайзияда Ўзбекистон ва унинг илмий-маданий меросига қизиқиш жуда юқори. Айниқса, сўнгги йилларда мамлакатимизда илмий ва маданий ҳаётда амалга оширилаётган кенг кўламли ислоҳотлар, “Янги Ўзбекистон” феномени доирасида илм-фан ва маърифатга берилаётган эътибор ҳамда Президентимиз томонидан олиб борилаётган тизимли саъй-ҳаракатлар уларда катта қизиқиш уйғотмоқда.

Ўйлайманки, ушбу конференциянинг таъсири нафақат икки мамлакат доирасида, балки бутун мусулмон олами миқёсида ҳам кенг акс-садо беради.”