Янгиликлар

Италиянинг BlancOne компаниясининг Ўзбекистондаги расмий вакили, ҳудудий менежер Эрика Риччида Ислом цивилизацияси марказида яратилган муҳит ва тақдим этилаётган маълумотлар катта таассурот қолдирди. Дунёнинг 60 га яқин давлатларида бўлган Эрика Риччининг таъкидлашича, Марказ энг эсда қоларли масканлардан бири.

Ташриф давомида меҳмон тарихий артефактлар, қўлёзмалар ва мультимедиа технологиялари асосида ташкил этилган экспозициялар билан танишди. Айниқса, тарихий маълумотларнинг замонавий интерактив ечимлар орқали тақдим этилгани меҳмонда катта қизиқиш уйғотди. У ташриф давомида қатор экспозициялар мазмунига алоҳида қизиқиш билдириб, тақдим этилган маълумотлар билан батафсил танишди.

Эрика Риччи, BlancOne Uzbekistan’нинг расмий вакили:

– Бу ерга биринчи марта келишим ва бу ташриф менда жуда катта таассурот қолдирди. Марказда тақдим этилган экспозициялар, тарихий мерос ва замонавий технологиялар уйғунлиги ҳақиқатан ҳам ҳайратланарли. Айниқса, ҳар бир бўлимда маълумотларнинг интерактив ва тушунарли тарзда ёритилгани менга жуда ёқди.

Мен дунёнинг 60 га яқин давлатларида бўлганман ва ишонч билан айта оламанки, бу жой энг эсда қоларли масканлардан бири. Бу ерда нафақат тарихни кўриш, балки уни ҳис қилиш ҳам мумкин. Ватанимга қайтганимдан кейин албатта барчага Ўзбекистонга ва ушбу Марказга ташриф буюришни тавсия қиламан.