Янгиликлар

Европада хавфсизлик ва ҳамкорлик ташкилоти Бош котиби Феридун Синирлиўғли Ўзбекистон Президенти Шавкат Мирзиёевнинг муаллифлик лойиҳаси бўлган Ислом цивилизацияси марказига ташрифдан олган таассуротлари узоқ вақт хотирасида сақланишини маълум қилди.

Европада хавфсизлик ва ҳамкорлик ташкилоти Бош котиби Феридун Синирлиўғли бошчилигидаги делегация Ўзбекистонга ташрифи доирасида Ўзбекистондаги Ислом цивилизацияси маркази билан яқиндан танишди.

Ташриф давомида меҳмонларга Ўзбекистон Республикаси Президенти Шавкат Мирзиёев ташаббуси билан барпо этилган Марказнинг асосий ғояси, меъморий ечими, экспозициялари ва илмий-маърифий аҳамияти ҳақида маълумот берилди.

Делегация аъзолари дастлаб Марказнинг асосий фойесида жойлашган “Буюк сиймолар галереяси” ҳамда муҳташам равоқларни кўздан кечирди. Ўзбекистон тарихи, давлатчилик анъаналари ва цивилизацион тараққиётини бадиий ёндашув ҳамда замонавий технологиялар уйғунлигида акс эттирган экспозициялар меҳмонларда катта қизиқиш уйғотди.

Шунингдек, ЕХҲТ делегацияси Марказдаги халқаро анжуманлар, илмий мулоқотлар ва нуфузли тадбирлар учун мўлжалланган конференция зали билан ҳам танишди. Залнинг архитектураси, техник имкониятлари ва умумий муҳити меҳмонларда алоҳида таассурот қолдирди.

ЕХҲТ Бош котиби Феридун Синирлиўғли Марказда яратилган муҳит, экспозицияларнинг мазмунан бойлиги ва тарихий меросни замонавий шаклда намоён этиш услубини юқори баҳолади.

“Бу ҳақиқатан ҳам жуда таъсирли маскан. Президент Шавкат Мирзиёевга ушбу беқиёс ташаббус учун самимий миннатдорлик билдираман. Бугунги ташрифдан олган таассуротларим қалбимда узоқ вақт сақланиб қолади. Бу ерда инсониятнинг умумий цивилизацияси ва бой маданий мероси ҳақида жуда кўп янги маълумотларга эга бўлдим. Экспозициядаги барча бўлимлар ниҳоятда гўзал ва мазмунли ташкил этилган. Ҳар бири менда катта ва унутилмас таассурот қолдирди”, — деди Феридун Синирлиўғли.