Янгиликлар

Беларусь Республикаси Бош вазири ўринбосари Юрий Шулейко раҳбарлигидаги делегация Ўзбекистонга ташрифи доирасида Ислом цивилизацияси маркази билан яқиндан танишди.

Меҳмонлар Марказда яратилган муҳит мамлакат тарихи ва цивилизациясини англатувчи кенг қамровли маърифий макон сифатида ташкил этилганини алоҳида таъкидлади. Делегация аъзолари фикрича, бу каби мажмуалар ёш авлоднинг тарихий хотираси ва давлатчилик тафаккурини шакллантиришда муҳим аҳамият касб этади.

Юрий Шулейко, Беларусь Республикаси Бош вазири ўринбосари:

– Таъкидлашни истардимки, ўз тарихини ва ўз давлатчилигини билиш бугунги жамиятда давлатчиликнинг энг муҳим асосларидан бири ҳисобланади. Шу маънода, Ўзбекистон Президенти Шавкат Мирзиёев раҳнамолигида ташкил этилган ушбу фундаментал тарихий маскан — музей, кўргазма мажмуаси ва бугунги Ўзбекистон тарихини англатувчи маърифий марказ сифатида — аҳолига, мамлакат фуқароларига, айниқса ёш авлодга юртингизнинг шаклланиш тарихи, ривожланиш ва бугунги замонавий қиёфага эга бўлиш босқичларини намоён этишда ғоят муҳим қадамдир. Бу, менимча, нафақат рамзий маънога эга, балки бугунги дунё давлатлари учун келгуси тараққиёт йўлида ўзига хос намуна ҳамдир. Бу ерда ушбу музейни барпо этган давлатнинг ўзига хос услуби ва руҳи яққол сезилади.