Янгиликлар

Германиялик прокурор Ислом цивилизацияси марказини оиласига ҳам кўрсатиш истагини билдирди

Германиянинг Гамбург шаҳри прокуратураси катта прокурори Герхард Бринкер Ўзбекистондаги Ислом цивилизацияси марказида бугунги илм-фан ва маданият ривожи билан боғлиқ тарихий илдизларни Марказ экспозицияларида яққол кўриш мумкинлигини қайд этди.

Ўзбекистондаги Ислом цивилизацияси марказига ташриф давомида Герхард Бринкер Марказнинг асосий экспозициялари, меъморий ечими, тарихий биноларни акс эттирувчи намойишлар, Қуръони Карим зали ҳамда замонавий интерактив технологиялар билан яқиндан танишди.

Герхард Бринкер Марказда Ўзбекистоннинг бой илмий-маърифий мероси, ислом цивилизацияси тараққиётига қўшган ҳиссаси ва ушбу мероснинг замонавий музейчилик ёндашувлари орқали намоён этилаётганини юқори баҳолади.

Меҳмоннинг таъкидлашича, Марказда ислом цивилизацияси фақат диний нуқтаи назардан эмас, балки илм-фан, маданият, маърифат ва тарихий тараққиёт билан узвий боғлиқ ҳолда очиб берилган. У айниқса бугунги илм-фан ва маданият ривожи билан боғлиқ тарихий илдизларни Марказ экспозицияларида яққол кўриш мумкинлигини қайд этди. Герхард Бринкер Марказга ташриф буюришни бошқаларга ҳам тавсия этишини билдириб, Тошкентдаги илк сафари унда катта таассурот қолдирганини таъкидлади. Келгусида ушбу масканни оила аъзоларига ҳам кўрсатиш истагида эканини айтди.

Герхард Бринкер, германиялик прокурор

– Мен музей архитектурасидан жуда катта таассурот олдим. Бино томон яқинлашар эканман, ўзимга: “Илгари шундай улуғвор иншоотни кўрганманми?” деган саволни бердим. Мени, айниқса, ислом динининг илмий ва маданий жиҳатлари қизиқтиради. Бу ерда бугунги маданиятимиз ва илм-фан тараққиёти билан боғлиқ кўплаб манбаларни, илдизларни кўриш мумкин. Бу жиҳат менда жуда катта қизиқиш уйғотди. Ислом цивилизацияси маркази нафақат тарихий экспонатлар жамланган маскан, балки турли даврлар, маданиятлар ва илм-фан анъаналари ўртасидаги боғлиқликни англаш имконини берадиган муҳим маърифий майдондир. Тошкентни биринчи марта кўриб турибман ва бу ажойиб шаҳарни кўргач, келгусида оилам билан яна қайтиб келиш ҳақида ўйлаяпман. Оиламга ҳам бу ерни кўрсатишни жуда истардим.