Янгиликлар

Ташриф давомида меҳмонлар Марказ экспозициялари орқали Ўзбекистоннинг кўп асрлик цивилизациявий мероси, Буюк Ипак йўли давридаги тарихий алоқалари, шунингдек, илм-фан, маданият ва маърифат тараққиётида тутган ўрни билан яқиндан танишди.

Делегация аъзоларида тарихий меросни замонавий форматда тақдим этиш услуби, рақамли технологиялар, интерактив экранлар ва сунъий интеллектга асосланган замонавий ечимлар орқали тарихий маълумотларни жонли, тушунарли ва таъсирчан намойиш этилгани юқори баҳоланди.

Меҳмонлар астрономия, математика ва табиий фанлар ривожига оид экспозициялар билан танишар экан, Ўзбекистон заминида шаклланган илмий мактаблар, буюк алломалар мероси ва уларнинг жаҳон цивилизацияси тараққиётига қўшган ҳиссасига алоҳида эътибор қаратди.

Экспозициялар билан батафсил танишган Гордон Танг Ўзбекистон ва Хитой ўртасидаги қадимий тарихий алоқаларга тўхталиб, Буюк Ипак йўли икки халқ ўртасидаги маданий, савдо ва маърифий мулоқотда муҳим ўрин тутганини қайд этди.

“Бу ерда мамлакатингизнинг тарихи ва маданияти ҳақида янада кенгроқ тасаввурга эга бўлдим. Ўзбекистон қадимдан Хитой билан яқин алоқаларга эга бўлган. Айниқса, Буюк Ипак йўли даврида бу замин буюк цивилизация марказларидан бири сифатида намоён бўлган. Музей орқали астрономия, математика ва табиий фанлар соҳасидаги илғор тарихингизни ҳам кўриш мумкин”, — деди Гордон Танг.

Шунингдек, Осиё жанг санъатлари уюшмаси Президентининг фикрича, спорт ва маърифат инсонни тарбиялаш, интизом, ирода ва мақсад сари интилиш каби қадриятларни шакллантиришда муҳим аҳамиятга эга.

Гордон Танг Ислом цивилизацияси марказини нафақат бой тарихий меросни намоён этувчи маскан, балки келажак авлод, айниқса ёшлар учун ўз юртининг цивилизацияси, илм-фани ва тараққиёт йўлини чуқур англашга хизмат қиладиган муҳим маърифий марказ сифатида баҳолади.