Янгиликлар

Қисқа фурсат ичида Ўзбекистоннинг янги ва ўта муҳим ташриф қоғозига айланиб, Гиннесснинг рекордлар китобига киритилган Ислом цивилизацияси маркази халқаро ҳамжамият томонидан самарали ташаббус сифатида эътироф этиляпти. Марказий ва Жанубий Осиё ўртасидаги ўзаро боғлиқлик бўйича Термиз мулоқоти доирасида амалий ташриф билан Ўзбекистонга бўлиб турган Покистон делегацияси вакиллари, хусусан, Иқтисодий ҳамкорлик ташкилоти Бош котиби Асад Мажид Хон сўнгги йилларда мамлакатимизда  амалга оширилаётган ташаббусларни олқишлашини маълум қилди.  

Асад Мажид Хон, Иқтисодий ҳамкорлик ташкилоти Бош котиби:

– Мен Иқтисодий ҳамкорлик ташкилоти Бош котиби сифатида мамлакатингизда бўлиб турибман. Айтишим мумкинки, биз жуда кўп умумийликларга эга бўлган икки мамлакат ва икки халқмиз. Бизни умумий тарих бирлаштириб туради. Масалан, Бобурийлар империясига асос солган Бобур Ўзбекистон заминидан чиққан. Шу нуқтаи назардан айтишим мумкинки, Ўзбекистон ташкилотимиз учун жуда муҳим ўрин тутади. Биз Ўзбекистоннинг, хусусан, муҳтарам Президент Шавкат Мирзиёев томонидан сўнгги йилларда илгари сурилган муҳим ва самарали ташаббусларни доим олқишлаймиз. Бу ташаббуслар ташкилотни ривожлантириш ва мустаҳкамлашда муҳим аҳамият касб этмоқда.