Янгиликлар

Қирғизистон Республикаси Миллий олимпия қўмитаси раиси Айваз Оморканов бошчилигидаги делегация Ўзбекистондаги Ислом цивилизацияси марказига ташриф буюрди.

Ташриф давомида меҳмонлар Марказ музей экспозицияси билан яқиндан танишди. Делегация вакиллари Қуръони карим зали, Биринчи Ренессанс, Иккинчи Ренессанс ҳамда “Янги Ўзбекистон — Янги Ренессанс пойдевори” залларини кўздан кечирди. Ҳар бир залда намойиш этилган тарихий мерос, илмий-маърифий мазмун ва замонавий экспозицион ечимлар меҳмонларда катта қизиқиш уйғотди.

Айниқса, Қуръони карим залидаги махсус намойиш, унинг бадиий-технологик ечими ва маънавий мазмуни делегация эътиборини тортди. Шунингдек, “Янги Ўзбекистон — Янги Ренессанс пойдевори” бўлимида жойлаштирилган Олимпия шаҳарчаси макети, спортчиларга бағишланган алоҳида экспозицион қисм ҳамда ёш авлод камолотига қаратилган ёндашув меҳмонларда алоҳида таассурот қолдирди.

Қирғизистон Республикаси Миллий олимпия қўмитаси раиси Айваз Оморканов Марказ ҳақидаги таассуротларини қуйидагича билдирди:

“Бугун бу ерда бўлиш ва Ўзбекистондаги Ислом цивилизацияси марказини ўз кўзим билан кўриш мен учун катта шараф. Менимча, бу маскан нафақат ўзбек халқи, балки бутун туркий дунё ва ислом олами учун ҳам улкан маънавий бойликдир.

Бу ерда яратилган муҳит, тарихий мероснинг намойиш этилиши ва экспозицияларнинг мазмун-моҳияти катта таассурот қолдирди. Сизлар бу ерда амалга оширган ишни оддий сўзлар билан таърифлаш қийин”.

Ташриф якунида Айваз Оморканов Марказнинг “Фахрий меҳмонлар” китобига ўз тилаклари ва самимий фикрларини ёзиб қолдирди.

Меҳмонлар Марказда миллий ва умуминсоний қадриятлар, илм-фан, маърифат, тарихий хотира ва замонавий тараққиёт ғоялари уйғун ҳолда намоён этилаётганини таъкидладилар. Томонлар бундай маърифий масканлар халқлар ўртасидаги дўстлик, маданий яқинлик ва ёшлар тарбиясига хизмат қилишини қайд этдилар.