Тезкор фикр, кучли мантиқ ва жамоавий руҳ: Ислом цивилизацияси марказида талабалар ўз иқтидорини намоён қилди
Ўзбекистондаги Ислом цивилизацияси марказида Ўзбекистон халқаро исломшунослик академияси талабалари иштирокида “Заковат” интеллектуал беллашуви ташкил этилди. Ёшларнинг билим ва салоҳиятини синовдан ўтказиш, уларда мустақил фикрлаш, таҳлил қилиш ва жамоавий ҳамкорлик кўникмаларини шакллантиришга қаратилган мазкур тадбир қизғин ва юқори руҳда ўтди.
Имом Мотуридий халқаро илмий-тадқиқот маркази билан ҳамкорликда ташкил этилган беллашувда ўз билим ва иқтидорига ишонган “Ислом ҳазораси”, “Фатҳ”, “Йўлчи юлдузлар”, “Улул Албоб”, “Нур”, “Нусрат” ҳамда “Академиклар” жамоалари иштирок этиб, турли мавзулар бўйича билимларини намойиш этдилар.
Интеллектуал баҳслар жараёнида иштирокчилар тарих, ислом тамаддуни, миллий ва маънавий қадриятлар, замонавий билимлар ҳамда мантиқий фикрлашга оид саволларга жавоб бердилар. Беллашув нафақат билимлар мусобақаси, балки ёшларнинг таҳлилий фикрлаш, тез қарор қабул қилиш ва жамоавий ишлаш қобилиятларини намоён этиш майдонига айланди.
Қизғин кечган баҳслар давомида ҳар бир жамоа ўз салоҳиятини намоён қилишга интилди. Талабалар саволларга жавоб бериш жараёнида билимдонлик билан бирга, тезкорлик, зеҳн ва ҳамжиҳатлик муҳим аҳамият касб этишини кўрсатиб бердилар.
Тадбир иштирокчилари таъкидлаганидек, бундай интеллектуал беллашувлар ёшларнинг илмий-маърифий салоҳиятини ошириш, китобхонлик ва билим олишга бўлган қизиқишини кучайтириш ҳамда миллий ва диний меросни чуқур ўрганишга хизмат қилади.
Қайд этиш жоизки, Ўзбекистондаги Ислом цивилизацияси марказида ташкил этилаётган бундай тадбирлар илм-маърифатни кенг тарғиб қилиш, интеллектуал муҳитни мустаҳкамлаш ва ёш авлодни маънавий жиҳатдан баркамол этиб тарбиялашга қаратилган саъй-ҳаракатларнинг амалий ифодаси ҳисобланади.