“Ўзбекистон шахмат ватани эканини кўпчилик билиши керак” — АҚШ банкининг бош директори Тошкентда ҳайратда қолди
АҚШнинг Экспорт-импорт банки бош директори Жон Йованович бошчилигидаги делегация Ўзбекистондаги Ислом цивилизацияси марказига ташриф буюриб, мамлакатимиз ҳудудида шаклланган қадимий цивилизациялар мероси, ислом маданияти ва замонавий музей технологиялари билан яқиндан танишди.
Ташриф давомида меҳмонлар аввало исломдан аввалги давр цивилизациялари бўлимида бўлиб, бу ерда намойиш этилаётган ноёб артефактлар ва тарихий экспозицияларни катта қизиқиш билан кўздан кечирдилар. Делегация аъзолари уч минг йиллик тарихга эга буғу ҳайкалчаси, Буюк ипак йўли инсталляцияси ҳамда мамлакатимиз ҳудудида шаклланган қадимий маданиятлар ҳақида ҳикоя қилувчи экспонатларга алоҳида эътибор қаратди.
Айниқса, Сурхондарё ҳудудидан топилган ва инсоният тарихидаги энг қадимий шахмат топилмаларидан бири сифатида баҳоланувчи асл шахмат доначалари меҳмонларда катта таассурот қолдирди. Уларни диққат билан томоша қилган Жон Йованович мазкур маълумотни албатта ҳамкасблари ва яқинларига етказишини таъкидлаб, “Ўзбекистон шахмат ватани эканлигини кўпчилик билиши керак”, дея ўз фикрларини билдирди.
Шунингдек, Чоч даврига оид босқон нусхаси ҳам меҳмонларнинг эътибор марказида бўлди. Экспонатнинг интерактив шаклда тақдим этилгани, уни ушлаб кўриш ва ҳаракатлантириш имконияти мавжудлиги делегация аъзоларида алоҳида қизиқиш уйғотди.
Ташриф Қуръони карим залида давом этди. Бу ерда намойиш этилган ноёб қўлёзмалар, муқаддас китоб тарихи ҳақидаги маълумотлар ҳамда замонавий мэппинг технологиялари асосида ташкил этилган мультимедиавий шоу меҳмонларда чуқур таассурот қолдирди. Хусусан, ҳазрати Усмон мусҳафининг асрлар давомида айнан Ўзбекистон ҳудудида сақланиб келаётгани ҳақидаги маълумот Жон Йованович томонидан юқори баҳоланиб, бу ҳақда ҳам ўз яқинларига сўзлаб беришини билдирди.
Марказ ташқи фасадида намойиш этилган мэппинг шоу ҳам делегация учун унутилмас тажрибага айланди. Ёруғлик, меъморчилик ва замонавий технологиялар уйғунлигида яратилган томошани кузатар экан, меҳмонлар лойиҳанинг ҳар бир детали пухта ўйланганини, бинонинг ташқи ва ички ечимларида юқори даражадаги эътибор сезилишини таъкидладилар.
Жон Йованович Ўзбекистондаги Ислом цивилизацияси маркази билан танишув унда катта таассурот қолдирганини, бу ерга яна қайтиш ва экспозицияларни батафсил ўрганиш учун кўпроқ вақт ажратиш истаги пайдо бўлганини алоҳида қайд этди.
Тарих, маърифат ва инновацион технологиялар бирлашган ушбу маскан халқаро меҳмонларда Ўзбекистоннинг бой маданий мероси ҳақида янада теран тасаввур уйғотмоқда.