Иорданиялик саноат магнати: “Ўзбекистон ислом илм-фани марказларидан бири эканини яна бир бор англадим”
Дунё бўйлаб кўплаб музейлар ва маданий марказларни кўрган Иорданиянинг йирик саноат компанияси раҳбари Ўзбекистондаги Ислом цивилизацияси марказида кутилмаган таассуротларга дуч келди. Ўзбекистон тарихини минг йилликлар кесимида акс эттирувчи ноёб экспозициялар, рақамли технологиялар ва буюк алломалар мероси меҳмонни ҳайратга солди. Унинг таъкидлашича, бу ерда ислом цивилизациясининг тараққиётга қўшган ҳиссаси жуда таъсирчан ва яхлит тарзда намоён этилган.
Иордания Ҳошимийлар Подшоҳлигининг йирик саноат корхоналаридан бири — “Jordan Phosphate Mines” компанияси бошқарув кенгаши раиси Моҳаммад Тнейбат Ўзбекистондаги Ислом цивилизацияси марказига ташриф буюрди.
Марказ экспозициялари билан танишув давомида у ноёб қўлёзмалар, рақамлаштириш жараёнлари, замонавий интерактив ечимлар ва илмий-тадқиқот йўналишларига алоҳида қизиқиш билдирди. Айниқса, Марказ фойесидаги “Буюк сиймолар галереяси” унда чуқур таассурот қолдирди. Фойе периметри бўйлаб жойлашган 14 та ярим овал равоқ, 110 хил рангдаги микромозаика тошлари асосида яратилган бадиий композициялар Биринчи ва Иккинчи Ренессанс даврлари, буюк алломалар, давлат арбоблари ва жадид маърифатпарварлари меросини яхлит тарихий манзара сифатида намоён этади.
Моҳаммад Тнейбат ўз таассуротлари билан ўртоқлашар экан, Ўзбекистонни ислом дини, илм-фан ва маърифат ривожига улкан ҳисса қўшган юрт сифатида эътироф этди.
“Дунёнинг кўплаб давлатларида, турли музейларда бўлганман. Аммо бу ерда ўзбек халқининг қадимги даврлардан бугунги кунгача бўлган тарихи, ислом цивилизацияси ривожига қўшган ҳиссаси жуда тизимли ва таъсирчан тарзда намоён этилган. Бундай марказни яратиш осон иш эмас. Бу ерда исломгача бўлган давр, ислом даври ва ундан кейинги тарихий жараёнлар кенг қамровда акс эттирилган. Марказ Ўзбекистон халқининг ислом тарихи, адабиёти ва илм-фанига қўшган ҳиссасини чуқур англаш имконини беради”, — деди у.
Унинг таъкидлашича, Самарқанд ва Бухоро каби тарихий шаҳарлар, Имом Бухорий мероси, Ибн Сино, Беруний ва бошқа буюк алломалар ҳақидаги маълумотлар Ўзбекистоннинг нафақат минтақавий, балки умумисломий цивилизация тараққиётидаги муҳим ўрнини яққол кўрсатади.
