Тошкентдаги халқаро иқтисодий мулоқот маданий меросимиз кашфиёти билан давом этмоқда
Тошкентдаги V Халқаро инвестиция форуми иқтисодий ҳамкорлик майдони сифатида хизмат қилаётган бир пайтда, унинг доирасида Ислом цивилизацияси марказига ташрифлар мамлакатлар ўртасидаги муносабатларнинг янада кенг қамровли эканини намоён этмоқда. Иқтисодий мулоқот доирасида юртимизда жамланган хорижий меҳмонлар Ўзбекистон Президенти Шавкат Мирзиёевнинг ташаббуси билан жаҳолатга қарши маърифат намунаси сифатида Тошкентда барпо этилган Ислом цивилизацияси марказига ташриф буюриб, маданий меросимизни ҳайрат билан кашф этишмоқда.
Тошкент шаҳрида ўтаётган V халқаро инвестиция форуми доирасида Хитой Халқ Республикаси Миллий энергетика маъмурияти раҳбари Ван Хунчжи бошчилигидаги делегация Ўзбекистон Президенти ташаббуси билан барпо этилиб, халқаро майдонда кенг эътироф этилаётган Ислом цивилизацияси марказига ташриф буюрди.
Ташриф давомида меҳмонлар Марказ экспозициялари орқали Ўзбекистон заминидан етишиб чиққан буюк мутафаккирлар ва алломаларнинг жаҳон илм-фани тараққиётига қўшган улкан ҳиссаси, ислом цивилизациясининг инсоният тараққиётидаги ўрни ҳамда ноёб қўлёзма мероси билан яқиндан танишдилар.
Айниқса, муқаддас Қуръон қўлёзмалари, илмий меросга бағишланган экспозициялар ҳамда тарихий воқеликларни замонавий мультимедиа технологиялари ёрдамида намойиш этиш услуби делегация аъзоларида катта қизиқиш уйғотди.
Меҳмонлар Марказ экспозициялари орқали Ўзбекистон ҳудуди азалдан илм-фан, маърифат ва цивилизациялар мулоқоти марказларидан бири бўлиб келганини алоҳида эътироф этдилар.
Ташриф якунида делегация аъзолари Марказда тарихий меросни сақлаш, тадқиқ этиш ва замонавий технологиялар орқали кенг жамоатчиликка етказиш бўйича амалга оширилаётган ишларга юқори баҳо бердилар.
