Янгиликлар

Ўзбекистон Республикаси Президенти ташаббуси билан барпо этилган ва мамлакатимиз ҳамда бутун ислом оламининг бой тарихий-маънавий меросини кенг тарғиб этишга қаратилган Ислом цивилизацияси марказига Япония Иқтисодиёт, савдо ва саноат вазири Мацуо Такэхико бошчилигидаги нуфузли делегация ташриф буюрди.

Ташриф давомида делегация аъзолари Марказ музейи экспозициялари, унда Ўзбекистон ҳудудида шаклланган бой илмий, маданий ва маънавий мерос, жаҳон цивилизацияси тараққиётига беқиёс ҳисса қўшган алломалар ҳаёти ва фаолияти билан яқиндан таништирилди.

Шунингдек, Марказнинг халқаро илмий ҳамкорликни ривожлантириш, маданий меросни асраб-авайлаш ва кенг жамоатчиликка етказишга қаратилган фаолияти ҳақида маълумот берилди.

Делегация вакиллари Марказда амалга оширилаётган кенг кўламли ишлар, тарихий меросни замонавий ёндашувлар асосида намойиш этиш бўйича яратилган имкониятларни юқори баҳоладилар. Айниқса, илм-фан, маърифат ва маданиятни уйғунлаштирган экспозициялар меҳмонларда катта таассурот қолдирди.

Ташриф якунида меҳмонлар Ислом цивилизацияси маркази нафақат Ўзбекистон, балки бутун минтақа учун муҳим илмий-маърифий платформа сифатида хизмат қилиши, халқлар ўртасидаги маданий мулоқот ва ўзаро англашувни мустаҳкамлашга муносиб ҳисса қўшишини таъкидладилар.

Мацуо Такэхико, Япония Иқтисодиёт, савдо ва саноат вазири:

–        Турли халқлар ва маданиятларнинг учрашуви, уларнинг ўзаро таъсири ҳамда шу асосда шаклланган халқнинг ўзига хос қиёфаси бу ерда жуда таъсирчан тарзда намойиш этилган. Мен бу ерда уч минг йиллик тарих нафасини ҳис қилдим. Ўзбекистон тарих давомида цивилизациялар чорраҳаси вазифасини бажарган. Бу тарих мазкур Марказ ва унинг экспозицияларида яққол акс эттирилган. Бу нафақат ушбу кўргазмани яратганлар, балки уни томоша қилаётган биз учун ҳам илҳом ва куч бағишлайди. Бу экспозиция одамларда олдинга интилиш, янги марраларни забт этиш истагини уйғотади. Менимча, бу жуда ажойиб ёндашув.