Имом Бухорий мероси Ўзбекистон ва Индонезия ўртасидаги маънавий кўприк сифатида эътироф этилди
V Тошкент халқаро инвестиция форуми доирасида мамлакатимизга ташриф буюрган Индонезия делегацияси Ислом цивилизацияси марказига Ўзбекистоннинг бой тарихи, илм-фан ва маърифат анъаналари, савдо йўллари орқали шаклланган маданий алоқалар ҳамда ислом цивилизацияси тараққиётидаги ўрни билан яқиндан танишди.
Дях Роро Эсти Видя Путри, Индонезия Республикаси Савдо вазири ўринбосари:
Бу менинг Ўзбекистонга ва Марказга илк ташрифим. Биринчи таассуротим жуда кучли бўлди. Марказ таъсирчан, кенг қамровли ва интерактив тарзда ташкил этилган. Бу ерда ислом цивилизациясининг шаклланиши, савдо йўллари орқали юзага келган алоқалар ва Ўзбекистоннинг келажак тараққиёти ҳақида кўп маълумот олдик. Менимча, бу Марказ тарихни одамларга яқинлаштиради. У тарихни фақат маълумот сифатида эмас, балки қизиқарли ва завқли тажриба сифатида тақдим этади, — деди Индонезия Республикаси Савдо вазири ўринбосари.
Индонезия ва Ўзбекистон ўртасидаги боғлиқлик фақат бугунги савдо-иқтисодий ҳамкорлик билан чекланмайди. Дунёда мусулмон аҳолиси энг кўп мамлакатлардан бири бўлган Индонезия учун Ўзбекистоннинг ислом цивилизациясидаги ўрни, айниқса, Имом Бухорий мероси алоҳида маънавий аҳамиятга эга. Суҳбат давомида Дях Роро Эсти Видя Путри Индонезиянинг биринчи Президенти Сукарнонинг Имом Бухорий мақбараси билан боғлиқ тарихий хотирасига ҳам тўхталиб, бу мерос бугун ҳам Индонезия жамоатчилигида Ўзбекистонга бўлган қизиқишни кучайтириб келаётганини қайд этди.
