Янгиликлар

Германиянинг Франкфурт Маин Финанcе ташкилоти делегация вакиллари Ўзбекистон Президенти Шавкат Мирзиёев ташаббуси билан бунёд этилган Ислом цивилизацияси марказида юртимизнинг кўп асрлик тарихи, бой маданий мероси ва буюк аждодларимиз илмий меросини акс эттирувчи экспозицияларни кўздан кечирдилар.

Айниқса, нодир қўлёзмалар, тарихий ҳужжатлар ва маданий мерос намуналарининг рақамли форматда тақдим этилиши меҳмонларда катта қизиқиш уйғотди. Экспозициялар орқали Марказнинг нафақат музей, балки илмий тадқиқотлар, таълим ва маърифатни уйғунлаштирган замонавий платформа сифатида шаклланаётгани эътироф этдилар.

Хубертус Ват, Франкфурт Маин Финанcе ташкилоти директори:

–        Менимча, Ислом цивилизацияси маркази инсоннинг кўзини очадиган, дунёқарашини кенгайтирадиган маскандир. Марказ бу заминларда шаклланган цивилизациянинг нақадар чуқур, бой ва кенг қамровли эканини намоён этади. Менга айниқса музейнинг таълимий концепцияси ёқди. Экспозициянинг тақдим этилиш услуби жуда пухта ўйланган. Саёҳат исломдан олдинги даврдан бошланиб, Биринчи Ренессанс, Иккинчи Ренессанс босқичлари орқали замонавий Ўзбекистонгача олиб келади. Мазкур концепция музейнинг беқиёс гўзаллиги ва замонавий тақдимоти билан уйғунлашиб, уни ҳақиқатан ҳам ноёб масканга айлантирган.