Бош прокуратуранинг 70 нафар фахрийси Ўзбекистондаги Ислом цивилизацияси марказига ташриф буюрди
Ўзбекистон Республикаси Бош прокуратурасининг 70 нафар фахрийси Ўзбекистондаги Ислом цивилизацияси марказига ташриф буюриб, халқимиз цивилизацияси, илмий мероси ва маънавий қадриятларининг минг йиллик тараққиёт йўли билан яқиндан танишди. Экспозициялар, нодир қўлёзмалар, замонавий технологиялар ва Янги Ўзбекистон ғоялари уйғунлашган муҳит меҳмонларда чуқур таассурот қолдирди.
Ўзбекистон Республикаси Бош прокуратурасининг 70 нафар фахрийси Ўзбекистондаги Ислом цивилизацияси марказига ташриф давомида Исломдан аввалги цивилизациялар тарихи, Биринчи ва Иккинчи Ренессанс даврлари, буюк алломалар мероси ҳамда Янги Ўзбекистонда амалга оширилаётган кенг кўламли ислоҳотлар ҳақида батафсил маълумот берилди. Шунингдек, “Янги Ўзбекистон — Янги Ренессанс пойдевори” ва Қуръони карим зали экспозицияси меҳмонларда алоҳида қизиқиш уйғотди.
Прокуратура фахрийлари Марказда тарихий мероснинг даврлар кесимида изчил ва яхлит тарзда намоён этилганини юқори баҳоладилар.
Бош прокуратура фахрийси Дилдора Сафоева Марказда аждодлар мероси ва келажак авлод учун яратилаётган имкониятлар уйғунлашганини таъкидлади. Унинг фикрича, ноёб кутубхона, илмий тадқиқотлар учун яратилган муҳит ва бой экспозициялар ҳар бир ташриф буюрувчида миллий ғурур туйғусини уйғотади.
Фахрийлар учун “Янги Ўзбекистон — Янги Ренессанс пойдевори” экспозициясида жойлашган Бош прокуратура фаолиятига бағишланган махсус бурчак алоҳида аҳамият касб этди. Экспозицияда прокуратура тарихи, соҳа ривожига ҳисса қўшган фахрийлар фаолияти ҳамда тарихий ҳужжатлар намойиш этилган.
Ташриф иштирокчиларидан бири Мирзо Обидов Марказ билан танишув тарих ҳақидаги тасаввурларни янада бойитишини қайд этди.
Тарихни билиш — ўзлигингни англаш демак. Бу ерда жамланган ноёб қўлёзмалар, экспонатлар ва илмий мерос инсонни ўтмиш билан юзма-юз қўяди. Бу марказ нафақат миллий, балки халқаро аҳамиятга эга бўлган маънавий-маърифий маскандир, — деди у.
Фахрийлар кенгаши аъзоси Гулбаҳор Исроилова ҳам ташриф таассуротлари билан ўртоқлашар экан, Марказни бутун бир цивилизация руҳи мужассам бўлган ноёб илм-маърифат маскани сифатида таърифлади.
Бу ерда инсон тарих ичига кириб қолади. Айниқса, кутубхона ва қўлёзмалар фонди менда катта таассурот қолдирди. Бу ер ёшларга ўз тарихи билан фахрланишни ва аждодлар меросидан илҳом олишни ўргатади, — деди у.
Ташриф якунида меҳмонлар Марказ кутубхонасига аъзо бўлиб, келгусида унинг илмий-маърифий имкониятларидан мунтазам фойдаланиш истагини билдирдилар.
Фахрийлар таъкидлаганидек, мазкур ташриф оддий экскурсия эмас, балки ўтмиш ва келажакни боғлаган маънавий мулоқотга айланди. Аждодлар меросини англаш, уни асраб-авайлаш ва келажак авлодларга етказиш ғояси иштирокчилар қалбида янада мустаҳкамланди.