Янгиликлар

Жаҳон банкининг Европа ва Марказий Осиё минтақаси бўйича вице-президенти Антонелла Бассани ва Халқаро валюта жамғармаси бошқарувчи директорининг ўринбосари Бо Ли бошчилигидаги делегациялар Ўзбекистонга амалга оширган расмий ташриф доирасида Ўзбекистондаги Ислом цивилизацияси марказида бўлди.

Ташриф давомида делегация Марказнинг экспозиция бўлимлари билан танишар экан, Марказнинг нафақат 3 минг йиллик тарихни ўзида мужассам этган музей, балки халқаро илмий-маърифий платформа сифатидаги ўрни, хорижий университетлар ва илмий муассасалар билан ҳамкорлик алоқалари, маданий меросни сақлаш, рақамлаштириш ва уни келажак авлодга етказишга қаратилган истиқболли лойиҳалар билан танишдилар.

Жаҳон банки Европа ва Марказий Осиё минтақаси бўйича вице-президенти Антонелла Бассани ўз таассуротлари билан ўртоқлашаркан, Марказга яна қайтиб келишни истаги туғилганини маълум қилди.

– Бу ерда тарихни шунчаки томоша қилмайсиз, балки уни ҳис қиласиз. Бу ерга ташриф буюришни узоқ вақтдан бери орзу қилардим ва бугун бу ушалганидан жуда мамнунман. Марказдаги ҳар бир экспозиция, ҳар бир экспонат Ўзбекистоннинг бой тарихи ва ислом цивилизацияси ривожига қўшган улкан ҳиссаси ҳақида ҳикоя қилади. Айниқса, тарихий қўлёзмалар ва нодир экспонатлар менда чуқур таассурот қолдирди. Мен ушбу Марказга яна қайтиб келишни истардим, – деди у.

Ташриф якунида Антонелла Бассани Марказнинг фахрий меҳмонлар китобига ҳам ўз тилакларини ёзиб қолдирди.