Ислом цивилизацияси марказида Ўзбекистон—Индонезия муносабатларининг янги йўналишлари муҳокама қилинди
Ўзбекистон ва Индонезия ўртасидаги ҳамкорлик энди нафақат сиёсий ёки иқтисодий муносабатлар, балки цивилизациявий мерос ва маънавий қадриятлар асосида ҳам янги босқичга кўтарилмоқда. Икки мамлакат ўртасидаги муштарак қадриятлар Индонезия Республикаси Халқ маслаҳати кенгаши Раиси Ахмад Музани бошчилигидаги делегациянинг Ўзбекистондаги Ислом цивилизацияси марказига ташрифи давомида яна бир бор ўз ифодасини топди.
Ташриф чоғида делегация аъзоларига Марказнинг «Буюк сиймолар галереяси»да жойлашган 14 та равоқ орқали буюк муҳаддислар, мутафаккирлар, алломалар ва давлат арбобларининг жаҳон илм-фани ҳамда цивилизацияси тараққиётига қўшган улкан ҳиссаси ҳақида маълумот берилди.
Шундан сўнг меҳмонлар Биринчи Ренессанс, Иккинчи Ренессанс, «Янги Ўзбекистон — Янги Ренессанс пойдевори» ҳамда Қуръони Карим залларидаги экспозициялар билан танишдилар. Бу ерда Ўзбекистон ҳудудида шаклланган илмий мактаблар, қўлёзмалар мероси, буюк алломаларнинг кашфиётлари ва замонавий музей технологиялари уйғунлиги меҳмонларда катта таассурот қолдирди.
Айниқса, Иккинчи Ренессанс экспозициясида сақланаётган, машҳур хаттот Умар Ақто томонидан кўчирилган ноёб Қуръони Карим парчаси делегация аъзолари эътиборини ўзига тортди. Асрлар давомида асраб келинган ушбу қўлёзма нафақат юксак хаттотлик санъати намунаси, балки бутун мусулмон оламининг бебаҳо маънавий бойлиги сифатида юксак баҳоланди.
Экспозициялар билан танишиш жараёнида Ахмад Музани Марказда намойиш этилаётган ҳар бир экспонат ислом цивилизациясининг илм-фан, маданият ва инсонпарварлик тамойиллари қандай юксак тараққий этганини ёрқин намоён этишини таъкидлади.
Биз Индонезия Республикаси Халқ маслаҳати кенгаши аъзолари, давлат ва жамоат арбоблари, уламолар, диний олимлар ҳамда таълим соҳаси вакиллари билан биргаликда Ўзбекистондаги Ислом цивилизацияси марказини зиёрат қилдик. Бу ерда жамланган бой мерос ислом цивилизациясининг қанчалик юксак тараққий этганини яна бир бор намоён этади.
Бу экспозициялар орқали биз айнан шу заминда илм-фан, маданият ва маърифатнинг буюк маркази шаклланганига яна бир бор амин бўлдик. Бу мерос Индонезия мусулмонлари учун фақат тарих эмас — меҳнат, илм ва садоқат орқали юксалиш мумкинлигини кўрсатувчи ҳаётий намунадир.
Ўзбекистондан минглаб километр узоқда жойлашган Индонезия учун ҳам ушбу Марказ беқиёс илҳом манбаи ҳисобланади. Ишончим комилки, у келажак авлодларни эзгулик, бағрикенглик ва турли дин ҳамда эътиқод вакилларига ҳурмат руҳида тарбиялашга хизмат қилади, – деди фахрий меҳмон.
Ташриф давомида Ахмад Музани Марказнинг «Фахрий меҳмонлар» китобига ўзининг самимий фикр-мулоҳазалари ва эзгу тилакларини ёзиб қолдирди.
Шундан сўнг Ахмад Музани Ўзбекистон мусулмонлари идораси раиси Шайх Нуриддин Холиқназар билан учрашди.
Мулоқот чоғида Ўзбекистон ва Индонезия ўртасидаги диний-маърифий ҳамкорликни янада кенгайтириш, зиёрат туризмини ривожлантириш, мусулмон мамлакатлари ўртасидаги илмий алоқаларни мустаҳкамлаш каби масалалар атрофлича муҳокама қилинди.
Томонлар келгусида икки мамлакат фатво марказлари ўртасида ҳамкорликни йўлга қўйиш ҳамда "Umra + O‘zbekiston" лойиҳасини Индонезияда кенг тарғиб қилиш ташаббусини ҳам муҳокама қилдилар. Мазкур лойиҳа Саудия Арабистонига умра зиёратига борувчи хорижлик зиёратчиларнинг сафар давомида ёки қайтиш йўлида Ўзбекистоннинг муқаддас қадамжолари, буюк алломалар мероси ва бой маданий ёдгорликлари билан танишиш имкониятини яратишни назарда тутади.
Мазкур ташриф икки мамлакат ўртасидаги муносабатларда янги босқични бошлаб берувчи муҳим дипломатик воқеалардан бири бўлиб, илм-маърифат ва инсонпарварлик ғоялари асосидаги стратегик шерикликни янада мустаҳкамлашга хизмат қилади.