Янгиликлар

Мисрнинг нуфузли «Ал-Жумҳурия» газетасида Ўзбекистонда ўтаётган I Халқаро Ислом цивилизацияси форуми ҳақида махсус мақола эълон қилинди. Унда Тошкент, Самарқанд ва Термиз шаҳарларида ташкил этилаётган мазкур анжуман тинчлик, бағрикенглик ва илм-маърифат ғояларини илгари суришга қаратилган муҳим халқаро мулоқот майдони сифатида эътироф этилди.

Нашрда форумда турли давлатлардан таниқли олимлар, мутафаккирлар ва диний уламолар иштирок этаётгани, Мисрдан эса Маданият, Вақф ишлари ва Олий таълим вазирлари, Республика муфтийси, Ал-Азҳар раҳбарияти ҳамда диний таълим ва фатво соҳасидаги етакчи мутахассислар қатнашиши алоҳида қайд этилди. Ўзбекистоннинг Мисрдаги элчиси Мансурбек Қиличевнинг таъкидлашича, форум ислом дунёсида интеллектуал, илмий ва маданий ҳамкорликни янада мустаҳкамлашга хизмат қилади. Шунингдек, Ал-Азҳар ва Миср Дорул Ифтоси каби нуфузли муассасаларнинг иштироки экстремизмга қарши маърифат асосида курашиш бўйича халқаро ҳамкорликни янада кучайтириш учун муҳим аҳамиятга эга.

Мақолада форум доирасида исломий меросни асраш, диний таълимни ривожлантириш, қўлёзмаларни муҳофаза қилиш ва рақамлаштириш, имомлар ҳамда тадқиқотчилар тайёрлаш бўйича қўшма лойиҳалар муҳокама қилиниши таъкидланган.

«Ал-Жумҳурия» нашри форумни Марказий Осиёдаги энг йирик илмий-маърифий анжуманлардан бири сифатида баҳолаб, у гуманитар ҳамкорликни кенгайтириш, цивилизациялар ўртасидаги мулоқотни мустаҳкамлаш ва исломнинг тинчликпарварлик, маърифатпарварлик ҳамда бағрикенглик ғояларини халқаро майдонда кенг тарғиб этишга хизмат қилишини алоҳида қайд этди.