Янгиликлар

Мисрнинг маданий-маърифий йўналишдаги Misralan ахборот нашри Ўзбекистонда «Ислом цивилизацияси: тинчлик, бағрикенглик ва маърифат йўли» мавзусидаги Биринчи халқаро ислом цивилизацияси форуми бошланганини кенг ёритди. Нашрда форум ислом цивилизациясининг инсонпарварлик моҳияти, илм-фан ва маданият тараққиётига қўшган ҳиссасини намоён этиш, шунингдек, Имом Бухорий, Имом Термизий ва Имом Мотуридий меросини халқаро миқёсда тарғиб қилишга қаратилгани таъкидланган. Шу билан бирга, анжуман доирасида қўлёзмалар, ислом санъати, муқаддас ёдгорликлар ва маданий меросга бағишланган кўргазмалар ҳамда илмий-маърифий тадбирлар Ўзбекистоннинг ислом цивилизацияси ва маданиятлараро мулоқот маркази сифатидаги нуфузини янада мустаҳкамлаши қайд этилган.

Ўзбекистоннинг Тошкент шаҳри, шунингдек, Самарқанд ва Термиз шаҳарларида 7–11 июль кунлари «Ислом цивилизацияси: тинчлик, бағрикенглик ва маърифат йўли» мавзусида Биринчи халқаро ислом цивилизацияси форуми бошланди. Анжуманда турли ислом мамлакатларидан диний уламолар ва нуфузли мутахассислар иштирок этмоқда.

Форум Ўзбекистондаги Ислом цивилизацияси маркази ҳамда ICESCO ҳамкорлигида ташкил этилган бўлиб, унинг асосий мақсади маърифат, тинчлик маданияти, ўзаро ҳурмат, маънавий мерос ва илмий мулоқот тамойилларига асосланган янги халқаро мулоқот майдонини шакллантиришдан иборат.

Анжуман ислом динининг ҳақиқий моҳияти – тинчлик, маърифат, раҳмат ва бунёдкорлик дини эканини намоён этиш, шунингдек, ислом цивилизациясининг илм-фан, маданият, фалсафа, таълим ва санъат тараққиётига қўшган улкан ҳиссасини ёритишни мақсад қилган. Шу билан бирга, форум ислом цивилизациясининг умуминсоний ва маърифий қадриятларини кенг тарғиб этишга хизмат қилади.

Форум доирасида Ўзбекистоннинг замонавий ислом цивилизацияси, маърифат ва маданиятлараро мулоқот марказларидан бири сифатидаги халқаро нуфузини янада мустаҳкамлашга алоҳида эътибор қаратилмоқда.

Тадбир ислом оламининг маънавий ва инсоний бирлигини мустаҳкамлашга хизмат қилувчи халқаро майдон, исломнинг инсонпарварлик моҳиятини тарғиб этувчи платформа, цивилизациялар, маданиятлар ва динлар ўртасидаги мулоқот маркази, шунингдек, исломнинг маънавий ва қўлёзма меросини асраш ҳамда тарғиб қилишга хизмат қилувчи муҳим анжуман сифатида қаралмоқда.

Форумда Мовароуннаҳрнинг ислом оламининг энг йирик илмий ва маънавий марказларидан бири сифатидаги тарихий ўрни алоҳида ёритилади. Бу заминдан етишиб чиққан буюк имомлар, мутафаккирлар, олимлар ва маърифатпарварларнинг инсоният тараққиётига қўшган ҳиссаси кенг муҳокама қилинади.

Хусусан, Имом Бухорий, Имом Термизий ва Имом Мотуридий мероси замонавий ислом цивилизацияси тикланишининг маънавий ва илмий пойдеворларидан бири сифатида баҳоланади. Уларнинг калом илми, ҳадисшунослик, васатийлик маданияти, маънавий тарбия ва ислом тафаккури ривожига қўшган беқиёс ҳиссасига алоҳида эътибор қаратилади.

Шунингдек, форумда ислом китобат маданияти, қўлёзмалар анъаналари, хаттотлик санъати ва илмни авлоддан авлодга етказиш масалалари ҳам муҳокама қилинади. Китоб, кутубхона, қўлёзма ва илм ислом цивилизациясининг интеллектуал буюклиги рамзи сифатида эътироф этилади.

Ислом меъморчилиги, хаттотлик, китобат маданияти ва тасвирий санъат намуналари ҳам ислом оламининг маънавий-илмий меросининг ажралмас қисми сифатида тақдим этилади. Улар мўътадиллик, ўзаро ҳурмат ва маданиятлараро мулоқот қадриятларини ўзида мужассам этган муҳим мерос сифатида баҳоланади.

Форум доирасида Имом Бухорий, Имом Термизий ва Имом Мотуридий мероси билан боғлиқ зиёрат йўналишларини ривожлантириш, шунингдек, уларнинг илмий ва маънавий меросини чуқурроқ англашга хизмат қилувчи таълимий зиёрат ташаббусларини қўллаб-қувватлаш масалалари ҳам кун тартибидан ўрин олган.

Анжуман дастуридан ислом цивилизациясининг бой илмий, маънавий ва бадиий меросини намоён этувчи кенг қамровли маданий-маърифий тадбирлар ўрин олган. Улар қаторида «Исломнинг муқаддас ёдгорликлари» халқаро кўргазмасининг тантанали очилиши, Тошкентдаги Ислом цивилизацияси марказига ташриф, Имом Бухорий ёдгорлик мажмуаси зиёрати, араб хаттотлиги, қўлёзмалар ва муқаддас санъат асарларига бағишланган кўргазмалар ташкил этилади.

Шунингдек, форум доирасида нодир қўлёзмаларнинг факсимиле нусхалари намойиши, рақамли меросни реставрация қилиш лойиҳалари тақдимоти, тарихий ва ҳужжатли фильмлар намойиши, шунингдек, халқаро руҳий мусиқа кечалари ҳамда ислом санъатига бағишланган тадбирлар ўтказилиши режалаштирилган.