Янгиликлар

Ўзбекистондаги Ислом цивилизацияси марказида гид-экскурсоводлар малакасини оширишга бағишланган халқаро семинар-тренинг ташкил этилди. Унда жорий йилнинг 7-11 июл саналарида Тошкент, Самарқанд ва Термиз шаҳарларида ўтказилган I Халқаро Ислом цивилизацияси форумига ташриф буюрган Санкт-Петербургнинг Россия этнография музейи мутахассиси Татьяна Емельяненко ҳамда Россия Давлат дин тарихи музейининг «Ислом» фонди сақловчиси Ирина Османова иштирок этишди. Халқаро мутахассислар музей экскурсияларини ташкил этиш, экспозицияларни илмий асосда талқин қилиш, ташриф буюрувчилар билан самарали мулоқот ўрнатиш ва маданий меросни холис ҳамда масъулият билан етказиш борасидаги кўп йиллик тажрибалари билан ўртоқлашдилар.

Семинарда гид фақат маълумот берувчи эмас, балки турли халқлар ва маданиятлар ўртасида ўзаро англашувни мустаҳкамлайдиган муҳим мулоқот элчиси экани алоҳида таъкидланди. Айниқса, тарихий воқеаларни талқин қилишда илмий холислик, ҳассослик ва масъулият тамойилларига қатъий амал қилиш зарурлиги қайд этилди. Зеро, тарихнинг нотўғри талқини халқлар ўртасида тушунмовчиликларга сабаб бўлиши мумкин бўлса, унинг ҳаққоний ва холис ёритилиши ўзаро ҳурмат, ишонч ва яқинликни мустаҳкамлашга хизмат қилади.

– Гид экскурсоводлар билан музей фаолияти ва этнографик экспозицияларни талқин қилиш тажрибаси ҳақида суҳбатлашдик. Биз музейларда экспонатларни шунчаки намойиш этмаймиз. Ҳар бир буюмнинг яратилиш тарихи, ундаги нақшлар, ранглар ва шакллар орқали халқнинг дунёқараши, турмуш тарзи ва маданий қадриятларини очиб беришга ҳаракат қиламиз, — деди Татьяна Емельяненко.

Семинар қизғин савол-жавоблар, амалий муҳокамалар ва ўзаро тажриба алмашинувлари руҳида ўтди. Унда музей экскурсияларини янада такомиллаштириш, турли тоифадаги ташриф буюрувчилар билан ишлаш усулларини такомиллаштириш ҳамда замонавий музей коммуникацияларини ривожлантириш масалалари юзасидан атрофлича фикр алмашилди.