Янгиликлар

Яқинда Ўзбекистондаги Ислом цивилизацияси марказида ташкил этилган I Халқаро Ислом цивилизацияси форуми доирасида «Ислом нури дурдоналари» кўргазмаси бўлиб ўтди. Унда ислом санъати ва маданий меросининг ноёб намуналари кенг жамоатчиликка намойиш этилди. Кўргазмада катта қизиқиш уйғотган экспонатлардан бири XIX–XX асрларга оид Усмонийлар даврида яратилган «Аллоҳ» ва «Муҳаммад» ёзувли каллиграфик паннолар бўлди.

Ўлчами 202,2 × 205,5 сантиметр, қалинлиги 3,5 сантиметр бўлган ушбу муҳташам асарлар нафақат салобати, балки юксак хаттотлик маҳорати ва бадиий ечими билан ҳам алоҳида аҳамиятга эга. Панноларда муқаддас «Аллоҳ» ва «Муҳаммад» калималари ислом каллиграфиясининг энг юксак анъаналари асосида нафис услубда акс эттирилган.

Усмонийлар даврида каллиграфия ёзув санъатидан анча юксак маънавий ва бадиий қадрият сифатида шаклланган. Масжидлар, мадрасалар, саройлар ва бошқа меъморий обидалар ана шундай каллиграфик асарлар билан безатилиб, улар нафақат безак, балки маънавий-эстетик тарбия воситаси вазифасини ҳам бажарган. Мазкур паннолар ҳам мусулмон халқларининг юксак эстетик диди, хаттотлик мактаби ва ислом санъатининг бой анъаналарини ўзида мужассам этган ноёб маданий мерос намунасидир.

Бугун ушбу бетакрор асарлар Ўзбекистондаги Ислом цивилизацияси маркази музей экспозициясининг энг қимматли намуналаридан бири сифатида ташриф буюрувчиларда катта қизиқиш уйғотмоқда. Улар орқали меҳмонлар Усмонийлар даври санъати, ислом каллиграфияси ва кўп асрлик маънавий мерос билан яқиндан танишиш имконига эга бўлмоқдалар. Бу каби ноёб экспонатлар Марказнинг нафақат музей, балки ислом цивилизациясининг бой илмий, маданий ва бадиий меросини жаҳон ҳамжамиятига етказувчи муҳим маърифий маскан сифатидаги ўрнини янада мустаҳкамламоқда.