Янгиликлар

Токио шаҳрида Ўзбекистон элчихонаси ҳамда Ислом цивилизацияси маркази ҳамкорлигида мазкур марказнинг Япониядаги илк кенг қамровли тақдимоти ташкил этилди, деб хабар бермоқда “Дунё” АА мухбири.

Тақдимотда Япониянинг таълим ва маданият муассасалари, хусусий компаниялар, сайёҳлик ташкилотлари вакиллари, Марказий Осиё давлатлари ҳамда Озарбайжон дипломатик корпуси аъзолари, олимлар, тадқиқотчилар, оммавий ахборот воситалари ходимлари, Японияда истиқомат қилаётган ватандошлар ва ўзбек талабалари иштирок этди.

Тадбирда Ўзбекистон Республикаси Президенти ташаббуси билан барпо этилган Ўзбекистондаги Ислом цивилизацияси марказининг асосий мақсад ва вазифалари, унинг ислом цивилизацияси, илм-фан ва маданият тарихини ўрганиш, ноёб қўлёзмалар ва маданий меросни жамлаш, сақлаш ва кенг тарғиб қилишга қаратилган фаолияти ҳақида батафсил маълумот берилди. Шунингдек, Марказ нафақат музей ва илмий-маърифий мажмуа, балки турли халқ ва цивилизациялар ўртасида мулоқотни мустаҳкамлайдиган халқаро платформа экани таъкидланди.

Тақдимот доирасида Марказ экспозицияларида акс этадиган мавзулар, хусусан, Ўзбекистоннинг бой тарихий-маданий мероси, Имом Бухорий, Имом Термизий, Имом Мотуридий каби буюк алломаларнинг жаҳон илм-фани ва ислом тафаккурига қўшган беқиёс ҳиссаси, шунингдек, Амир Темур ва темурийлар даврининг цивилизация тараққиётидаги ўрни ҳақида тақдимотлар ўтказилди.

Марказ директори маслаҳатчиси, профессор Турсунали Қўзиев “Маърифат орқали келажакка” мавзусида маъруза қилиб, Ўзбекистондаги Ислом цивилизацияси маркази тарихий хотирани тиклаш, маданий меросни асраб-авайлаш ва уни келажак авлодларга етказиш, шунингдек, халқаро илмий ва маданий ҳамкорликни ривожлантиришда муҳим ўрин тутишини таъкидлади.

Япония Ривожланаётган иқтисодиётлар институти профессори Манабу Симидзу ўз чиқишида Ўзбекистонда амалга оширилаётган Учинчи Ренессанс ғояси ва Ўзбекистондаги Ислом цивилизацияси маркази фаолияти мамлакатнинг бой маънавий меросини халқаро майдонда кенг тарғиб этишга хизмат қилаётганини қайд этди. У Марказ Япония ва Ўзбекистон ўртасидаги илмий, маданий ва гуманитар алоқаларни янада мустаҳкамлаш учун муҳим майдон бўлиб хизмат қилишини алоҳида таъкидлади.

Тадбир давомида иштирокчиларга Ўзбекистондаги Ислом цивилизацияси маркази фаолиятига бағишланган тақдимот фильми намойиш этилди. Шунингдек, юртимиздан етишиб чиққан буюк алломалар ҳақидаги видеоматериаллар ҳамда Ўзбекистоннинг маданий мероси ва меъморий обидаларини акс эттирувчи фотокўргазма катта қизиқиш билан қарши олинди.

Мазкур тақдимот Ўзбекистондаги Ислом цивилизацияси марказининг халқаро нуфузини янада мустаҳкамлаш, унинг илмий-маърифий салоҳиятини хорижий ҳамкорларга танитиш ҳамда Ўзбекистон ва Япония ўртасида маданий-гуманитар ҳамкорликни янги босқичга олиб чиқиш йўлидаги муҳим қадамлардан бири бўлди.