Ислом цивилизацияси маркази ходими “Инновацион лойиҳалар” танловида Гран-при соҳиби бўлди
Ватанимиз мустақиллигининг 35 йиллиги арафасида Алишер Навоий номидаги Ўзбекистон Миллий кутубхонаси томонидан “Ёш кутубхоначилар” VI Республика илмий-амалий форуми ўтказилди.
Форум доирасида ахборот-кутубхона соҳасини замонавий ёндашувлар асосида ривожлантириш, инновацион ғояларни қўллаб-қувватлаш, истиқболли лойиҳаларни амалиётга жорий этиш ҳамда ёш мутахассисларнинг салоҳиятини намоён этиши учун имконият яратиш мақсадида “Инновацион лойиҳалар” танлови ташкил этилди.
Танловда республика ҳудудларидан 76 та стартап лойиҳа иштирок этди. Саралаш босқичи натижаларига кўра, энг истиқболли деб топилган 12 та лойиҳа финал босқичига йўлланма олди.
Финал босқичида иштирокчилар ўз лойиҳаларини экспертлар ва танлов ҳайъати аъзоларига тақдим этди. Лойиҳалар долзарблиги, инновацион ёндашуви, амалий аҳамияти, амалга ошириш механизмлари, барқарорлиги ва кутилаётган ижтимоий самарадорлиги мезонлари асосида баҳоланди.
Якуний натижаларга кўра, Ўзбекистондаги Ислом цивилизацияси маркази Кутубхона ва архив ҳужжатлари бўлими бошлиғи Равшан Қодиров томонидан тақдим этилган лойиҳа танловнинг энг юқори мукофоти — Гран-прига муносиб деб топилди.
Равшан Қодиров ушбу натижа хусусида тўхталиб, қуйидагиларни таъкидлади:
“Танловда Гран-при соҳиби бўлганимни, аввало, касбий фаолиятимга билдирилган юксак баҳо сифатида қабул қиламан. Бугун ахборот-кутубхона соҳасида рақамли технологиялар ва инновацион ёндашувлардан самарали фойдаланиш муҳим аҳамият касб этмоқда. Тақдим этилган лойиҳа ҳам соҳадаги замонавий талаблар ва амалий эҳтиёжлардан келиб чиққан ҳолда ишлаб чиқилган. Ушбу натижа келгусида лойиҳани янада такомиллаштириш ва амалиётга самарали татбиқ этиш борасидаги масъулиятимизни янада оширади”, — деди Равшан Қодиров.
Танлов натижаси Ўзбекистондаги Ислом цивилизацияси маркази мутахассисларининг ахборот-кутубхона соҳасида замонавий билим ва инновацион ёндашувларни амалиётга татбиқ этиш борасидаги салоҳиятини намоён этди.
Шунингдек, мазкур ютуқ Марказда кутубхона ва архив ҳужжатларини сақлаш, ўрганиш, тизимлаштириш ҳамда замонавий технологиялар асосида улардан фойдаланиш имкониятларини кенгайтиришга қаратилган ишлар изчил давом этаётганининг амалий натижаларидан бири бўлди.
Танлов ғолиблари диплом ҳамда қимматбаҳо совғалар билан тақдирланди.