Янгиликлар

Ўзбекистон Республикаси мустақиллигининг 35 йиллиги юбилейи арафасида Ўзбекистондаги Ислом цивилизацияси марказида «Учинчи Ренессанс пойдеворини барпо этишда фуқаролик жамияти институтларининг иштироки» мавзусида давра суҳбати бўлиб ўтди.

Мулоқотда Олий Мажлис Қонунчилик палатаси депутатлари, давлат ва жамоат ташкилотлари, турли дин ва конфессиялар вакиллари, оммавий ахборот воситалари ҳамда фуқаролик жамияти институтлари, шунингдек, Ёшлар парламенти аъзолари иштирок этди.

Тадбирда Учинчи Ренессансни барпо этишда жамиятнинг кучи ҳақида фикр алмашилди. Фуқаролик жамияти институтларининг ўрни, парламент ва жамоатчилик ҳамкорлиги, ННТлар, ОАВ, ўзини ўзи бошқариш органларининг жамият тараққиётидаги масъулияти, шунингдек, бу йўналишда яратилган ҳуқуқий имкониятлар муҳокама қилинди.

Олий Мажлис Қонунчилик палатаси депутати Зафар Худойбердиев давра суҳбатининг айнан Ислом цивилизацияси марказида ўтказилиши чуқур маънога эга эканини таъкидлади. Унинг фикрича, Биринчи ва Иккинчи Ренессанс мероси жамланган бу маскан Учинчи Ренессанс ҳақида сўз юритиш учун энг мазмунли мулоқот майдонларидан биридир.

– Учинчи Ренессанс пойдеворини мустаҳкамлаш фақат давлатнинг вазифаси эмас. Бу жараёнда фуқаролик жамияти институтларининг роли беқиёс. Оммавий ахборот воситалари, нодавлат нотижорат ташкилотлари, жамоат бирлашмалари ва ўзини ўзи бошқариш органлари жамиятдаги ўзгаришларнинг нафақат кузатувчиси, балки унинг фаол иштирокчиси бўлиши керак. Шу боис уларнинг ҳуқуқий имкониятларини кенгайтириш — Учинчи Ренессанс пойдеворини мустаҳкамлашнинг муҳим шартларидан биридир, — деди депутат.

Давра суҳбатидан кейин иштирокчилар Марказ экспозициялари билан танишди. Ташриф жараёни эса мулоқотда кўтарилган ғояларни тарихий мерос ва замонавий тафаккур уйғунлигида яна бир бор ҳис этиш имконини берди.

Олий Мажлис Қонунчилик палатасининг Демократик институтлар, фуқаролик жамиятини ривожлантириш қўмитаси раиси Гулруҳ Агзамова Марказга ташрифни парламент ва фуқаролик жамияти ўртасидаги мулоқотнинг мантиқий давоми сифатида баҳолади.

– Бугун биз фақат фуқаролик жамияти институтларининг Учинчи Ренессансдаги ўрни ҳақида гапирмадик. Биз ҳар бир инсоннинг бу жараёндаги шахсий масъулияти ҳақида ҳам ўйладик. Чунки Ренессанс фақат давлат дастурлари ёки қонунлар билан барпо этилмайди. У инсоннинг ўз устида ишлаши, илмга интилиши, жамият олдидаги масъулиятини англаши ва Ватан тараққиётига дахлдорлик ҳисси билан шаклланади.
Ислом цивилизацияси марказида биз Ўзбекистон тарихининг нафақат буюклигини, балки бу тарих бизга қандай масъулият юклаётганини ҳам ҳис қилдик. Бу ердаги ҳар бир экспонат, ҳар бир илмий мерос бизга аждодларимиз қолдирган даражага муносиб бўлишимиз кераклигини эслатади.
Шу маънода, Марказ — ўтмиш ҳақида маълумот берадиган музейгина эмас. У инсонни ўзига савол беришга, ўз имкониятларини қайта баҳолашга ва келажакдаги ўз ўрни ҳақида ўйлашга ундайди, — деди Гулруҳ Агзамова.

Ёшлар парламенти аъзоси Ислом Мамадиев эса Марказдаги экспозициялар Учинчи Ренессанснинг моҳиятига оид яна бир муҳим хулосагас сабаб бўлганини таъкидлади.

– Биз бугун ўз тарихимизнинг кўламини кўрибгина қолмадик — унинг олдидаги масъулиятимизни ҳам ҳис қилдик. Ўзбекистон заминида шаклланган илмий ва маданий мероснинг жаҳон тамаддунига таъсири шунчалик улканки, бу тарихни билган ёшнинг Ватан ҳақидаги тасаввури ўзгармаслиги мумкин эмас.
Айниқса, Марказда тарихий мероснинг замонавий технологиялар, сунъий интеллект ва интерактив ечимлар орқали намоён этилаётгани муҳим. Бу ерда ёш томошабин эмас — тарихни англаш жараёнининг бевосита иштирокчисига айланади.
Менимча, Марказнинг энг катта аҳамияти ҳам шунда: инсон бу ердан фақат янги маълумотлар билан эмас, балки “Учинчи Ренессансни барпо этишда менинг ўрним қандай?” деган савол билан чиқади. Ана шу саволнинг пайдо бўлиши — энг катта натижа, — деди И. Мамадиев.