Янгиликлар

«Ислом цивилизацияси: янги нигоҳ — янги кашфиётлар» Халқаро медиафорумининг университетлар дастури Ўзбекистондаги 20 та олий таълим муассасасини қамраб олади.

24–27 август кунлари Тошкент ва Самарқанддаги олий таълим муассасаларида 34 та ижодий учрашув, маҳорат дарси ва тақдимот ўтказилади. Дастурнинг асосий қисми пойтахтда ташкил этилади ва унда Тошкентдаги 19 та университет иштирок этади. Яна бир майдон Самарқанддаги «Ипак йўли» туризм ва маданий мерос халқаро университети бўлади.

Университетлар дастурида камида 10 та мамлакат ОАВ вакиллари иштирок этади. Учрашувлар мавзуси замонавий журналистика ва халқаро медиа, сунъий интеллект ва рақамли технологиялар, ҳужжатли кино, ноширлик фаолияти, маданий дипломатия, тарихий мерос ҳамда туризм йўналишларини қамраб олади.

Дастур, энг аввало, хорижий экспертларнинг талабалар ва профессор-ўқитувчилар билан бевосита мулоқотини таъминлашга қаратилган. Ушбу формат бир вақтнинг ўзида ўнлаб университет майдонларини қамраб олиш ва медиафорумнинг профессионал дастурини унинг асосий тадбирларидан ташқарида ҳам кенгайтириш имконини беради.

Ўзбекистон Республикаси Мустақиллигининг 35 йиллиги байрами арафасида ўтказиладиган Халқаро медиафорумнинг марказий майдони эса Ўзбекистондаги Ислом цивилизацияси маркази бўлади.

Форумда қарийб 50 мамлакатдан 300 нафар медиа ва экспертлар ҳамжамияти вакиллари — медиакомпаниялар, ахборот агентликлари ва телеканаллар, халқаро нашрлар ва рақамли платформалар раҳбарлари, шунингдек, эксперт ва ижодий соҳа вакиллари иштирок этади.