Янгиликлар

Яманнинг «САБА» ахборот агентлиги Ўзбекистон Президенти Шавкат Мирзиёевнинг мамлакат мустақиллигининг 35 йиллиги муносабати билан Янги Тошкентда ўтказилган тантанали маросимдаги нутқи ҳақида мақола эълон қилди. Унда давлат раҳбари Ўзбекистон тараққиётнинг янги босқичига кирганини таъкидлаб, келгуси ўн йиллик миллий юксалиш ўн йиллиги бўлишини қайд этган. Президент, шунингдек, инсон капитали, иқтисодиёт, соғлиқни сақлаш, экология, қонун устуворлиги, маҳаллий жамоаларни ривожлантириш ҳамда тинчлик ва бағрикенгликни мустаҳкамлашга қаратилган еттита миллий дастур амалга оширилишини маълум қилган.

Ўзбекистон Президенти Шавкат Мирзиёев мамлакат тараққиётнинг янги босқичи арафасида турганини таъкидлади. Унинг қайд этишича, келгуси ўн йиллик миллий юксалиш даври бўлади ва бу мақсадга халқимизнинг саъй-ҳаракатлари, бирдамлиги ва меҳнати орқали эришилади.

Давлат раҳбари Янги Тошкентда Ўзбекистон Республикаси мустақиллигининг 35 йиллиги муносабати билан ўтказилган тантанали маросимда сўзга чиқиб, ушбу улуғ сана муносабати билан Ўзбекистон халқини самимий муборакбод этди.

«Ўзбекистон келгуси йилларда инсон капиталига сармоя киритиш, иқтисодиётни ривожлантириш, соғлиқни сақлаш тизимини такомиллаштириш, атроф-муҳитни муҳофаза қилиш, қонун устуворлигини мустаҳкамлаш, маҳаллий жамоаларни ривожлантириш, тинчлик ва бағрикенгликни қарор топтиришга қаратилган еттита миллий дастурни амалга оширади», деди Президент.

Ўзбекистон Президенти ёшлар мамлакат келажагини белгилаб берувчи ҳал қилувчи куч эканини таъкидлади. Уларни қўллаб-қувватлаш учун ҳар йили 20–25 триллион сўм маблағ йўналтирилаётганини қайд этди. Шунингдек, ёшлар мамлакатдаги тадбиркорлик соҳасининг қарийб 35 фоизини ташкил этаётгани, ўзбек спортчилари ва ёшларининг халқаро майдонларда эришаётган ютуқларини алоҳида таъкидлади.

Шунингдек, давлат раҳбари Ўзбекистон миллий футбол терма жамоасининг тарихий ютуғини – илк бор жаҳон чемпионатида иштирок этиш ҳуқуқини қўлга киритганини юқори баҳолади. Самарқандда биринчи марта Жаҳон шахмат олимпиадасини ўтказишга тайёргарлик ишлари, шунингдек, шахматчи Жавоҳир Синдоровнинг жаҳон чемпиони унвони учун курашаётганини ҳам қайд этди.

Президент Ўзбекистон барқарор тараққиётни таъминлаш ҳамда тинчлик, дўстлик ва бағрикенглик мамлакати сифатидаги нуфузини янада мустаҳкамлашга қаратилган очиқ, прагматик ва тинчликсевар сиёсатни изчил давом эттиришини таъкидлади.

Давлат раҳбари мамлакатнинг энг муҳим байрамларидан бирининг Янги Тошкентда ўтказилаётгани тадбирга янада кўтаринки руҳ бағишлаётганини қайд этди. У Янги Тошкент пойтахтга янада кўрк бағишлаб, Янги Ўзбекистоннинг салоҳияти ва кучини намоён этувчи ҳақиқий тараққиёт марказига айланишига ишонч билдирди.

Президент Ўзбекистон халқи 1991 йилда ўзининг эркин иродаси ва қатъияти билан давлат мустақиллигига эришганини таъкидлаб, буюк истиқлол илдизлари уч минг йилдан зиёд давлатчилик ва қадимий цивилизация анъаналарига бориб тақалишини қайд этди.

Унинг таъкидлашича, мустақиллик халққа ўз қадр-қиммати ва мақомини, муқаддас динини, она тилини ҳамда унутилаётган миллий қадриятларини қайта тиклаш имконини берди.

Тантанали маросимда бугунги эркин ҳаёт учун жонини фидо қилган буюк аждодлар ва маърифатпарварлар хотираси ёд этилди. Шунингдек, мамлакат мустақиллигини мустаҳкамлашга ҳисса қўшган, бугун ҳаёт бўлмаган барча юртдошларнинг меҳнати ва жасорати юксак қадрланди.

Маросимда Ўзбекистон Республикасининг биринчи Президенти, таниқли давлат ва сиёсат арбоби Ислом Абдуғаниевич Каримов хотираси ҳам чуқур эҳтиром ва ҳурмат билан ёдга олинди.

Давлат раҳбари мустақилликнинг энг катта аҳамияти, аввало, инсон қадри, унинг эркинлиги ва муносиб ҳаёт кечириш ҳуқуқида намоён бўлишини таъкидлади.

Президент Ўзбекистон технологиялар соҳасида дунёга илғор ташаббусларни таклиф этадиган марказга айланиши, ўзбек тили эса рақамли дунёда илм-фан ва технологияларни яратиш тили бўлиши зарурлигини таъкидлади.

Давлат раҳбари Янги Ўзбекистон ёшларини мамлакатнинг энг катта бойлиги ва унинг келажагини белгилаб берувчи ҳал қилувчи куч деб атади.

«Мамлакатимиз тараққиётнинг мутлақо янги босқичига кирмоқда. Келгуси ўн йиллик биз учун миллий юксалиш ўн йиллиги бўлади», деди Президент.

Ушбу мақсадга халқимизнинг ақл-заковати, меҳнати ва бирдамлиги орқали эришилишини таъкидлади.

«Мамлакатимизнинг очиқ, прагматик ва тинчликсевар сиёсати узоқ муддатли тараққиётни таъминлашга хизмат қилмоқда. Марказий Осиёда яхши қўшничилик, стратегик шериклик ва дўстлик муносабатларини кенгайтириш борасида тарихий ютуқларга эришилди. Мустақил Давлатлар Ҳамдўстлиги, Европа Иттифоқи, АҚШ, Осиё-Тинч океани минтақаси мамлакатлари, араб ва ислом дунёси давлатлари билан алоқалар янада мустаҳкамланди», деди Шавкат Мирзиёев.

Тантанали маросим давомида Президент дипломатик корпус аъзолари ва хорижий оммавий ахборот воситалари вакилларига, шунингдек, АҚШ, Туркия ва Сингапурдан ташриф буюрган юқори мартабали меҳмонларга самарали ҳамкорлик учун миннатдорлик билдирди.

Давлат раҳбари нутқининг якунида халққа ишонч билан мурожаат қилиб, шундай деди:

«Бугун биз кечагидан кучлимиз, иншооллоҳ, эртага бугунгидан ҳам кучлироқ бўламиз. 35 йиллик мустақил тараққиёт йўлимиз бир ҳақиқатни кўрсатди: халқ ва давлат ягона мақсад атрофида бирлашиб, астойдил меҳнат қилса, эришиб бўлмайдиган мақсаднинг ўзи йўқ».

Президент юртдошларни ягона халқ ва ягона Ватан сифатида биргаликда янги ҳаёт ва буюк келажак барпо этишга чақирди. У мамлакатнинг олтин асри ва янги буюк тарихини халқ ўзининг қатъияти, меҳнати ва бирдамлиги билан яратишига қатъий ишонч билдирди.

Давлат раҳбари ўз нутқини мустақилликнинг ҳақиқий ижодкори ва бунёдкори бўлган Ўзбекистон халқига салом йўллаш билан якунлади:

«Яшасин Ўзбекистон Республикаси! Яшасин Ўзбекистон халқи!».