Янгиликлар

Вьетнам Республикасининг «ROX Group» компанияси асосчиси Чань Ань Туан Ўзбекистондаги Ислом цивилизацияси марказига ташрифи давомида мамлакат тарихининг минг йиллик саҳифаларидан тортиб, бугунги тараққиёт жараёнларигача бўлган яхлит манзара билан танишди.

Президент Шавкат Мирзиёев ташаббуси ва ғояси асосида барпо этилган мазкур мажмуа меҳмонда нафақат ўзининг улкан меъморий кўлами, балки тарих, илм-фан, маданият ва замонавий технологияларни бир маконда уйғунлаштирган концепцияси билан катта таассурот қолдирди.

Айниқса, «Янги Ўзбекистон — Янги Ренессанс пойдевори» экспозицияси Чань Ань Туанда алоҳида қизиқиш уйғотди. Унда Ўзбекистоннинг тарихий тараққиёт босқичлари билан бир қаторда, мамлакатнинг сўнгги йиллардаги кенг кўламли ўзгаришлари, иқтисодий ва ижтимоий ривожланиш жараёнлари замонавий мультимедиа ечимлари орқали намоён этилган.

Чань Ань Туаннинг Марказ ҳақидаги фикрлари эса ташрифнинг яна бир муҳим жиҳатини очиб берди. Унинг таъкидлашича, Марказ инсонда Ўзбекистон ҳақидаги тасаввурни сезиларли даражада бойитади:

«Мен Тошкентга жуда кўп марта келганман, аммо бу Марказга биринчи бор ташриф буюришим. Бу ерда Ўзбекистоннинг бой тарихини акс эттирувчи, шу билан бирга, ниҳоятда улкан ва юқори технологиялар билан жиҳозланган мажмуани кўришимни кутмагандим. Айниқса, Ўзбекистон тараққиётининг учинчи босқичи — Янги Ўзбекистон даври мени жуда ҳайратга солди.

Менимча, бу масканни кўрган ҳар бир инсоннинг Ўзбекистонга бўлган ҳурмати янада ортади. Чунки бу ерда мамлакатнинг қандай буюк тарихга эга экани билан бирга, бугун қандай суръатда ривожланаётгани ҳам яққол кўрсатилади. Ўзбекистон 

Марказий Осиёнинг энг жадал ривожланаётган мамлакатларидан биридир.

Менда икки жиҳат алоҳида таассурот қолдирди. Биринчиси — Ўзбекистоннинг бой ва қадимий тарихи. Аммо мени энг кўп ҳайратга солгани — 2016 йилдан бошланган тараққиётнинг янги босқичи, яъни Янги Ўзбекистон даври бўлди».

Ташрифнинг яна бир муҳим жиҳати шундаки, Чань Ань Туан Марказда кўрганлари унинг Ўзбекистондаги инвестиция имкониятларига бўлган қизиқишини янада кучайтирганини таъкидлади.

«Мен Вьетнамдаги «ROX Group» компаниясининг асосчисиман. Айни пайтда Ўзбекистонга инвестиция киритиш имкониятларини кўриб чиқяпмиз. Марказга биринчи бор ташриф буюрдим ва бу ташрифдан сўнг Ўзбекистонга катта миқдорда инвестиция киритишимизга янада ишонч ҳосил қилдим».

Ислом цивилизацияси марказининг ғояси ҳам айнан шунда — Ўзбекистоннинг буюк тарихини намоён этиш билан бирга, унинг бугунги қиёфаси ва келажак салоҳиятини дунёга кўрсатиш.

Чань Ань Туаннинг таассуротлари эса тарих ва замонавий тараққиёт уйғунлигига қурилган ушбу ёндашув хорижий меҳмонларда нафақат қизиқиш, балки Ўзбекистон билан ҳамкорлик қилишга бўлган ишончни ҳам мустаҳкамлаётганини кўрсатди.