Анадолунинг XV асрга оид жанговор мероси Ислом цивилизацияси маркази экспозициясида
Жанг майдонида отлиқ учун нафақат қурол, балки ишончли ҳимоя воситаси ҳам муҳим ҳисобланади. Ислом цивилизацияси маркази экспозициясида намойиш этилаётган XV асрга оид отлиқ жангчининг оёқ ҳимоя зирҳи ана шундай ҳарбий анжомлардан биридир. Мазкур оёқ зирҳи Анадолу ҳудудида XV асрда бронзадан ясалган бўлиб, унинг ўлчами 35,8 × 23 сантиметрни ташкил этади.
У металл қоплама, уни бир-бирига боғлаб турувчи металл ҳалқали тўр ҳамда чарм тасмалардан ташкил топган. Зирҳнинг асосий пластинаси қуйи қисмида игнабaргсимон, юқори қисмида эса бироз қия йўналган бўртма қовурғалар қабартириб ишланган. Ушбу безаклар орасида, шунингдек, зирҳнинг юқори ва қуйи қисмларида ислимий нақшлар сақланиб қолган. Юқори қисмида эса ёзув парчаси мавжуд.
Зирҳнинг ён пластиналари асосий қисмга ҳалқалар воситасида бириктирилган. Ҳаракатланувчи ҳалқали тўр жангчининг оёқ бўғимларига мослашиб, эркин ҳаракатланиш имконини берган. Сақланиб қолган чарм тасмалар эса зирҳни оёққа маҳкамлаш вазифасини бажарган. Бундай XV асрга оид оёқ зирҳлари Қорақўюнли ва Оққўюнли туркларнинг сиёсий-маданий муҳити билан боғланади. Кейинчалик шу каби зирҳ шакллари Усмонийларнинг ҳарбий анъаналарида ҳам қўлланган.
Бугун бу ашё фақат жанговар анжом сифатида эмас, балки ўрта асрлар ҳарбий маданияти, ҳунармандлик маҳорати ва безак санъати уйғунлашган тарихий манба сифатида ҳам қимматлидир.