Сомонийлар давридан етиб келган ноёб кумуш баркаш Ислом цивилизацияси маркази экспозициясида намойиш қилинмоқда
Мазкур буюм X аср охири — XI асрнинг биринчи ярмига оид бўлиб, Сомонийлар давридаги юқори мансабдор шахс буюртмаси асосида тайёрланган. Баркаш зарҳалланган кумушдан ишланган бўлиб, ўлчами 4,2 × 37 × 21,9 смни ташкил этади. Буюм яхлит болғаланган кумуш листдан тайёрланган. Тўртбурчак шаклдаги баркаш марказида медальон ичига мифологик мавжудот тасвири ўйма усулда ишланган ва зарҳалланган ҳошия билан ўралган. Ён юзалари ҳам зарҳалланган бўлиб, тўрт томондаги деворчалар марказида ва бурчакларида мифологик мавжудотлар тасвирига оид безаклар акс эттирилган. Ашёнинг асосий безакларидан бири бу арабий ёзувлар. Улар бўрттириб ишланган, ёзувлар оралиғи эса ботиқ нуқталар билан безатилган.
Баркашдаги ёзувда буюм кимга аталгани аниқ кўрсатилган:
«Шон-шуҳрат, фаровонлик ва давлат амир, ҳожиб, буюк раҳбар, саркарда Абу Мансур Нуштегин ал-Нуъманий учун; [Аллоҳ] унинг давлатини абадий қилсин ва умрини узоқ қилсин».
Ёзувда «амир», «ҳожиб», «буюк раҳбар», «саркарда» каби юқори мартаба ва унвонларнинг тилга олиниши ушбу буюмнинг юксак мансабдор шахс учун махсус тайёрланган ҳашаматли ашё бўлганидан далолат беради.