Янгиликлар

Ўзбекистонда иқтидорли талабаларни қўллаб-қувватлаш мақсадида 2027/2028 ўқув йилидан Амир Темур номидаги давлат стипендиясини жорий этиш таклиф қилинмоқда. Ҳозирча бу ташаббус Вазирлар Маҳкамаси қарори лойиҳасида назарда тутилган.

Стипендияга давлат, нодавлат ва хорижий олий таълим муассасалари, шунингдек, қўшма таълим дастурларининг охирги икки босқичида таҳсил олаётган талабалар даъвогар бўлиши мумкин. Ҳар бир олий таълим ташкилоти учун битта стипендия ажратилиши таклиф этилган. 

📌Даъвогардан талаб этилади:
— аъло баҳоларга ўқиш;
— илмий ёки ижодий фаолият билан шуғулланиш;
— конференция ва танловларда иштирок этиш;
— Ўзбекистон тарихи ва давлат тилини билиш;
— камида битта хорижий тилни билиш;
— битирув малакавий ишини Амир Темур ва темурийлар меросига бағишлаш ёки шу йўналишда камида 2 та илмий иш эълон қилган бўлиш.

Лойиҳага кўра, танловнинг кейинги босқичига тавсия этилган талабгорлар ҳужжатларини ҳар йили 5–15 сентябрь кунлари my.edu.uz тизими орқали юклайди. Шунингдек, стипендия соҳиби бўлган талабаларни бакалавриатни тугатгандан кейин бир йил ичида магистратуранинг кундузги таълим шаклига танловсиз, қўшимча давлат гранти асосида қабул қилиш таклиф этилмоқда. 

Эслатма: ҳозирча бу талаблар қарор лойиҳасидаги таклифлар ҳисобланади, яъни якуний тартиб тегишли қарор қабул қилингач аниқланади.