Қадр-қиммат, билим ва адолат: Ислом цивилизацияси маркази ва UNFPA халқаро лойиҳаларга тайёргарлик кўрмоқда
Ислом таълимотида аёлларнинг ҳуқуқлари, қадр-қиммати, илм олиш имкониятлари ва ижтимоий ҳаётдаги ўрни халқаро кўргазма ҳамда илмий конференциянинг асосий мавзусига айланиши кутилмоқда. Ўзбекистондаги Ислом цивилизацияси маркази директори Фирдавс Абдухолиқов БМТ Аҳолишунослик жамғармасининг (UNFPA) Ўзбекистондаги доимий вакили ва Тожикистон бўйича директори доктор Нигина Абасзода ҳамда ташкилотнинг Ўзбекистондаги вакили ўринбосари Матлуба Умурзакова билан учрашиб, мазкур йўналишдаги икки халқаро лойиҳа концепциясини муҳокама қилди.
Учрашувда Ўзбекистондаги Ислом цивилизацияси марказида «Исломда аёллар ҳуқуқлари: қадр-қиммат, билим ва адолат» номли кўргазма ҳамда «Ислом таълимоти нуқтаи назаридан аёллар ҳуқуқлари ва имкониятларини кенгайтириш» мавзусида халқаро конференция ташкил этиш масалалари кўриб чиқилди.
Президент ташаббусининг амалий давоми
Мазкур лойиҳалар Ўзбекистон Республикаси Президенти Шавкат Мирзиёевнинг 2026 йил май ойида UNFPA ижрочи директори билан бўлиб ўтган олий даражадаги учрашувида илгари сурилган таклифлар ижроси доирасида тайёрланмоқда.
Ушбу ташаббуслар ислом таълимотида аёллар ҳуқуқлари масаласини тарихий, маданий ва маърифий нуқтаи назардан кенгроқ ўрганиш ҳамда мазкур мавзуда халқаро мулоқотни ривожлантиришга қаратилган.
Хусусан, аёлларнинг илм олиш ҳуқуқи, инсон қадр-қиммати, адолат тамойиллари ва жамият ҳаётидаги иштироки бўлажак кўргазма ҳамда конференциянинг муҳим мазмуний йўналишлари сифатида муҳокама қилинди.
«Исломда аёллар ҳуқуқлари: қадр-қиммат, билим ва адолат» — янги кўргазма концепцияси
Учрашув давомида UNFPA томонидан ишлаб чиқилган «Исломда аёллар ҳуқуқлари: қадр-қиммат, билим ва адолат» кўргазмасининг дастлабки концепцияси тақдим этилди.
Музокараларда кўргазманинг асосий ғояси, мазмуний йўналишлари, экспозиция ечимлари ва ташкилий жиҳатлари юзасидан фикр алмашилди.
Лойиҳадан кўзланган мақсад — ислом таълимотида аёлларга оид ҳуқуқий, ахлоқий ва маърифий масалаларни кенг жамоатчиликка тушунарли тарзда етказиш, шунингдек, аёлнинг қадр-қиммати ва илм олиш имкониятларига доир қарашларни илмий асосда ёритишдан иборат.
Аёллар ҳуқуқлари ва имкониятларини кенгайтириш — халқаро конференция мавзуси
Мулоқотда муҳокама қилинган иккинчи йирик ташаббус — «Ислом таълимоти нуқтаи назаридан аёллар ҳуқуқлари ва имкониятларини кенгайтириш» мавзусида халқаро конференция ўтказиш режаси бўлди.
Конференция концепцияси доирасида ислом таълимотида аёлларнинг ҳуқуқлари, таълим олиш имкониятлари ва ижтимоий фаоллигига оид масалаларни илмий муҳокама қилиш кўзда тутилмоқда.
Учрашув иштирокчилари тадбирнинг мазмуни, ташкилий жиҳатлари ва уни амалга ошириш бўйича кейинги қадамларни муҳокама қилди.
Мазкур конференция ташаббуси диний-маърифий мерос, аёллар ҳуқуқлари ва уларнинг жамият ҳаётидаги иштироки билан боғлиқ масалалар юзасидан халқаро фикр алмашиш учун майдон яратишга қаратилган.
UNFPA ва Ислом цивилизацияси маркази ҳамкорлиги
Учрашув давомида UNFPA вакиллари кўргазма ҳамда халқаро конференция учун ишлаб чиқилган дастлабки концепцияларни тақдим этди.
Томонлар ҳар икки лойиҳанинг мазмуний йўналишларини такомиллаштириш, экспозиция ечимларини ишлаб чиқиш ва ташкилий масалаларни ўзаро мувофиқлаштириш юзасидан фикр алмашди.
Алоҳида эътибор лойиҳаларни Ислом цивилизацияси маркази билан яқин ҳамкорликда амалга ошириш имкониятларига қаратилди.
Музокаралар якунида кўргазма ва конференция концепцияларини такомиллаштириш, тайёргарлик ишларини ҳамкорликда давом эттириш ҳамда кейинги ташкилий босқичлар бўйича ўзаро иш олиб боришга келишилди.
Шу тариқа, учрашув Ўзбекистондаги Ислом цивилизацияси маркази ва UNFPA ўртасида аёллар ҳуқуқлари, қадр-қиммати ва таълим олиш имкониятларига бағишланган халқаро маърифий лойиҳаларни тайёрлашда навбатдаги амалий қадам бўлди.
Президент Шавкат Мирзиёев ташаббуси билан барпо этилган Ислом цивилизацияси марказида мазкур лойиҳаларни амалга ошириш режаси тарихий-маърифий меросни ўрганиш билан бир қаторда, аёлларнинг жамиятдаги ўрни, ҳуқуқлари ва имкониятларига оид долзарб масалаларни халқаро миқёсда илмий муҳокама қилиш истиқболларига ҳам эътибор қаратмоқда.





