Янгиликлар

Маънавий меросга ҳисса: Маҳалла фонди марказга тарихий асарлар топширди

1872 йилги тилла ҳошияли Қуръон ва 1920 йилги достон Ўзбекистондаги Ислом цивилизацияси маркази музейида намойиш этилади

Тошкент шаҳрида ўтказилган «Буюк ўтмиш мероси — маърифатли келажак асоси» халқаро форуми доирасида Ўзбекистоннинг “Маҳалла” хайрия жамоат фонди тарихий аҳамиятга эга қўлёзмаларни Ислом цивилизацияси марказига топширди.

Маросимда Фонд Республика бошқаруви раиси Дилшодбек Усмонов иштирокчиларга мурожаат қилиб, шундай деди:

“Бу марказ давлатимиз раҳбарининг ташаббуси билан барпо этилди. Биз эса ушбу улуғвор ишга кичик бўлса-да,, ҳисса қўшиш ниятида тарихий қўлёзмаларни тақдим этмоқдамиз. Улар халқимиз, ёшларимиз ҳамда меҳмонлар учун маънавий озуқа ва маърифат манбаи бўлишига ишонамиз.”

Марказ коллекцияси икки қимматбаҳо асар билан бойиди:

Қуръони Карим — ҳижрий 1289 / 1872 йилда Эроннинг Шарқий Озарбайжон вилоятида машҳур хаттот Мир Муҳаммад Нурий (Умар Рушадийнинг шогирди) томонидан кўчирилган нусха. Тилла ҳошиялар билан безатилган ушбу қўлёзма 200 × 130 мм ҳажмга эга.

“Ҳазрати Шоҳмардон ва Саййид Баттол Ғозий достони” — ҳижрий 1340 / 1920 йилда ёзилган адабий асар. Ўлчами 220 × 150 мм бўлиб, тарихий-адабий мероснинг ноёб намунаси сифатида экспозициядан жой олди.

Эслатиб ўтамиз, жорий йилнинг 26-27 сентябр кунлари бўлиб ўтган халқаро экспертлар форумида дунёнинг 20 дан ортиқ мамлакати ва 100 дан зиёд мутахассис иштирок этди. IRCICA, ICESCO, TURKSOY, Бутунжаҳон Ислом олами робитаси, Оксфорд университети, Россия Фанлар академияси, Christie’s каби нуфузли ташкилотлар вакиллари маърузалари билан қатнашди.