Янгиликлар

Ўзбекистондаги мегалойиҳа кутубхонаси учун замонавий концепция шакллантирилмоқда

Ўзбекистондаги Ислом цивилизацияси марказида ташкил этиладиган кутубхона нафақат китоблар тўплами, балки интеллектуал муҳит, электрон тизимлар ва замонавий қулайликларни ўзида мужассам этган илмий маскан бўлиши кўзда тутилмоқда. Шу муносабат билан кутубхона дизайни ва интерьерига бағишланган муҳокама ўтказилди.

Муҳокамада Марказ директорининг биринчи ўринбосари Фирдавс Ҳалимов, Алишер Навоий номидаги Ўзбекистон Миллий кутубхонаси директори Умида Тешабоева ва соҳанинг етакчи мутахассислари иштирок этишди. Кутубхонада китобхонлар учун смарт гардероблар, компютерлаштирилган электрон тизим ва қулай ишчи ўринлар яратилиши режалаштирилган.

Техник жиҳозлаш, моддий база, интерьери ва хизмат сифатини таъминлаш масалалари алоҳида муҳокама қилинди. Шунингдек, қурилиш ишларида кутубхона соҳаси мутахассислари билан яқин ҳамкорликда иш олиб борилаётгани таъкидланди.

Ҳозирда кутубхона бўлимида 26 та илмий-инновацион лойиҳа устида иш олиб борилмоқда. Янги бинода бир вақтнинг ўзида 226 нафар китобхонга хизмат кўрсата оладиган, 125 мингга яқин китоб фондига эга электрон кутубхона тизими яратилиши кўзда тутилган.