Янгиликлар

Гулбаҳор Енгибаева, Лебап вилояти Тарих ва ўлкани ўрганиш музейи директори (Туркманистон) 

Муҳтарам Ўзбекистон Президенти Шавкат Мирзиёев раҳбарлигида яратилган  Ўзбекистондаги Ислом цивилизацияси маркази – бу буюк лойиҳа. “Марказий Осиё: умумий маънавий-маърифий мерос ва умумий келажак” халқаро конгрессида қатнашиб, бу бино билан яқиндан танишдик. Объект жуда қизиқарли. Қадимий ансамблни эслатадиган меъморий ёндашуви диққатимизни тортди.

Ичкарига кирганимизда эса музей, ундаги экспозициялар билан танишиб, ҳис қилган туйғуларни сўз билан ифода этиш қийин. Музей жуда бой, илмий-маърифий жиҳатдан юксак даражада ташкил этилган.

Кўриниб турибдики, бу ерда кўплаб олимлар, академиклар, музей ходимлари, рассомлар, дизайнерлар улкан меҳнат қилган. 

Биз Ўзбекистон тарихининг ҳар бир бўлимини, ҳар бир даврини ўргандик. Бу — бутун бир давр, бутун бир тарихий жараён.

Музейлар ҳақида гапирганда, шунга амин бўламизки, музейлар миллий қадриятларнинг ўчоғи ва сақловчисидир. Шу билан бирга, улар келажакка боғловчи нурли кўприк ҳамдир. Бугун биз буни амалда кўрдик.

Ажойиб жиҳати – у замонавий ускуналар билан жиҳозланган. Музейда жуда кўп интерактив технологиялар, видеороликлар мавжуд. Бу эса келажак авлодга тарбия бериб, уларда тарихга қизиқиш ва муҳаббат уйғотади.

Бугунги Конгресс айнан шу марказда ўтаётгани учун Марказий Осиё мамлакатлари ва Озарбайжондан келган барча делегатлар иштирок этмоқда. Ҳар биримиз айтамиз: бизнинг тарихимиз бир, маданиятимиз бир, ҳатто тилларимиз ҳам ўхшаш. Шунингдек, биз келажагимиз эркин, тинч, бирдам ва эзгу бўлишини тилаймиз.