Франция генерали Ислом цивилизацияси марказига юқори баҳо берди
Франция Қуролли кучлари вазирлиги генерали Эмерик Виненже бошчилигидаги делегация Ислом цивилизацияси марказига ташриф буюриб, унинг фаолияти, илмий-тадқиқот йўналишлари, экспозициялари ва Ўзбекистоннинг бой илмий-маънавий мероси билан яқиндан танишди. Ноёб экспозициялар ва замонавий интерактив технологиялар меҳмонларда улкан таассурот қолдирди.
Ташриф давомида меҳмонларга марказнинг асосий экспозициялари — Қуръони Карим зали, исломдан олдинги давр тарихи, Биринчи ва Иккинчи Ренессанс даврларига бағишланган бўлимлар, шунингдек, “Янги Ўзбекистон — Янги Ренессанс пойдевори” экспозицияси ҳақида атрофлича маълумот берилди. Замонавий технологиялар ёрдамида яратилган интерактив кўргазмалар, мультимедиали инсталляциялар ва тарихий жараёнларни визуал намойиш этиш усуллари делегация аъзоларида катта қизиқиш уйғотди.
Генерал Эмерик Виненже ташрифдан олган таассуроти билан ўртоқлашар экан, қуйидаги фикрларни билдирди:
“Лойиҳанинг кўлами ва унинг илм-фан асосида ташкил этилгани менда улкан таассурот қолдирди. Марказдаги ҳар бир экспозиция Уйғониш даврларини чуқур ёритиб, Ўзбекистоннинг тарихий тараққиёт йўлини жонли акс эттирмоқда. Тарихий экспонатларнинг бойлиги ва ноёб артефактларнинг бир масканда тўплангани — катта меҳнат ва юксак масъулият маҳсули эканини кўрсатади”
Шунингдек, делегация аъзолари марказ меъморчилиги, экспозицияларнинг замонавий музей стандартлари асосида жойлаштирилгани, мультимедиали технологияларнинг самарали қўлланилиши ва тадқиқот ишларининг юқори даражада ташкил этилганини юқори баҳоладилар.
Учрашув якунида Франция делегацияси Ислом цивилизацияси марказини Марказий Осиёдаги муҳим илмий-маърифий хаб сифатида эътироф этиб, келгусида маданий-гуманитар ҳамкорлик, илмий алмашинув ва қўшма лойиҳалар юзасидан ўзаро алоқаларни янада мустаҳкамлаш истагини билдирди.