“Тарихнинг замонавий талқини”: Тожикистон делегацияси Ислом цивилизацияси марказини олқишлади
Тожикистон кўнгиллилар ташкилотлари ассоциацияси раиси Зарнигор Ражабзода Президент Шавкат Мирзиеёв ташаббуси билан ўтказилган “Марказий Осиё: умумий маънавий-маърифий мерос – умумий келажак” халқаро конгресси доирасида Ўзбекистондаги Ислом цивилизацияси марказига ташрифидан олган катта таассуротлари билан ўртоқлашди. Унинг таъкидлашича, марказда тарихий мероснинг замонавий технологиялар билан уйғун тарзда намойиш этилиши ҳақиқий илмий-маърифий ёндошув намунасидир.
Зарнигор Ражабзоданинг фикрича, марказ ўзбек халқи тарихи билан бир қаторда Тожикистон, Қирғизистон, Қозоғистон, Туркманистон каби қардош давлатлар цивилизациясига оид қимматли маълумотларни ҳам ўз ичига олгани билан аҳамиятлидир. Бу ҳолат Марказий Осиё халқларининг умумий илдизлари ва муштарак тарихий меросини яна бир бор тасдиқлайди.
“Музей экспонатлари орасида адабиёт, илм-фан ва давлат бошқаруви соҳасида из қолдирган тожик арбоблари ҳақидаги маълумотларни кўриб, чин дилдан қувондим. Бу бизнинг умумий тарихий манбаларимиз, маданий алоқаларимиз ва қардошлик ришталаримизни янада мустаҳкамлайди”, — дейди Зарнигор Ражабзода.
Шунингдек, у Тошкентда ўтказилган Марказий Осиё ва Озарбайжон ёшларининг йиғилишида ёшлар сиёсати, ҳамкорлик ва тажриба алмашиш масалаларининг муҳокама қилинаётганини юқори баҳолади.
“Ҳар бир делегация ўз тажрибаси билан ўртоқлашмоқда, аммо мақсад умумий — дўстликни мустаҳкамлаш ва тарихий меросни келажак авлодга тўғри етказиш. Рақамли технологиялар эса бу жараённи янада самарали қилади”, — дея қўшимча қилди у.