Саудия элчиси Ўзбекистон Президенти ташаббусларини олқишлади
Саудия Арабистони Подшоҳлигининг Тошкентдаги Фавқулодда ва Мухтор Элчиси Президент Шавкат Мирзиёев ташаббуси билан бунёд этилган Ўзбекистондаги Ислом цивилизацияси марказига ташриф буюрди. Меҳмонни Марказ директори, Фирдавс Абдухолиқов самимий кутиб олди.
Учрашув доирасида Ўзбекистон ва Саудия Арабистони ўртасидаги илмий-маърифий ҳамкорликни кенгайтириш масалалари муҳокама қилинди. Хусусан, Марказ ҳамда Саудия Арабистонида фаолият юритаётган нуфузли илмий муассасалар — Эр-Рияддаги Подшоҳ Файсал Ислом тадқиқотлари маркази, шунингдек Подшоҳ Салмон номидаги Араб тили мажмуаси билан қатор қўшма лойиҳаларни амалга ошириш имкониятлари муҳокама этилди.
“Саудия Арабистони ва Ўзбекистон ўртасидаги дўстлик муносабатларининг изчил ривожланаётганини қайд этиш лозим. Бу жараёнда Президент Шавкат Мирзиёевнинг очиқ ва конструктив сиёсати муҳим аҳамият касб этади. Икки давлат ўртасида ислом илм-фани, маданияти ва маънавий меросини ўрганиш йўналишларида ҳамкорлик янада кучайишига ишонч билдираман. Ҳамкорлигимиз аввалида қўшма илмий-тадқиқот лойиҳаларини йўлга қўйиш муҳим экани маълум. Шунингдек, уламолар ва тадқиқотчилар ўртасида ўзаро ташрифлар ташкил этиш, қўшма конференциялар ўтказиш мақсадга мувофиқ деб ўйлайман. Араб тили, ислом илмлари ва манбашунослик бўйича иқтидорли ёшлар учун махсус ўқув дастурларини ишлаб чиқиш таклифини ҳам илгари сурамиз. Шу билан бирга, қўлёзмалар ва исломий мерос соҳасида тажриба алмашиш ўзаро ҳамкорликни янада мустаҳкамлашига ишонч билдирамиз.
Ўзбекистондаги Ислом цивилизацияси маркази каби буюк ғоя ва ташаббус ҳақиқатан ҳам мақтовга лойиқ. Мен аввало ушбу буюк лойиҳа муаллифи Президент жаноби олийларини самимий қутлаб, ушбу эзгу ишларни амалга ошираётганлари ҳамда дунё халқларини тинчлик ва ўзаро ҳамжиҳатликка чорлаётганлари учун миннатдорлик билдираман. Музей залларига алоҳида эътибор қаратилгани, дунёда ягона нусхада тайёрланган безаклар билан безатилгани ва ислом динининг ҳар бир жиҳати ҳурмат билан намоён этилгани жуда ёқди, Марказ ислом меросини жаҳон миқёсида тарғиб қилишда муҳим ўрин тутади. Биз келгусида ҳамкорлигимиз янада кенгайишига ишонамиз,” — дея таъкидлади элчи Юсуф ал-Утайбий.
Шунингдек, элчи музейнинг биринчи ренесанс бўлими ҳамда Қуръон залидаги экспозициялар, залларниниг ўзига хос дизайни ва ислом меросига бўлган чуқур ҳурмат ҳар бир деталда намоён эканини алоҳида таъкидлади.
Юсуф ал-Утайбий Марказ экспозицияларида замонавий технологиялар, рақамли ечимлар ва тарихий экспонатларнинг уйғун тарзда тақдим этилганини юқори баҳолаб, мазкур марказни минтақада муҳим илмий-маърифий маскан сифатида эътироф этди. Учрашув якунида томонлар амалий ҳамкорликни янада фаоллаштириш ва келишилган йўналишлар бўйича мувофиқлашган дастурлар ишлаб чиқишга келишиб олдилар.