Тарих билан юзма-юз: Сирдарё вилояти делегацияси Ислом цивилизацияси марказида
Сирдарё вилоятидан ташриф буюрган Халқ депутатлари Сирдарё вилояти Кенгаши ҳамда кенгаш аппарати ходимлари Ўзбекистондаги Ислом цивилизацияси марказида бўлишди. Президент Шавкат Мирзиёевнинг Сирдарё вилоятига ташрифи доирасида ташкил этилган ушбу сафар делегация учун нафақат маърифий ташриф, балки юртимизнинг бебаҳо тарихи ва цивилизацион меросини чуқур англашга хизмат қилган муҳим маданий воқеа бўлди.
Марказдаги ноёб қўлёзмалар, қимматли артефактлар, интерактив экспозициялар ҳамда асрлар давомида шаклланган илмий-интеллектуал мерос делегация аъзоларида катта таассурот қолдирди. Меҳмонлар Марказнинг яратилиш тарихи, Президент ташаббуси билан амалга оширилган кенг кўламли лойиҳалар ва экспозициялар концепцияси билан батафсил танишдилар.
Покиза Аҳмаджонова, Халқ депутатлари Сирдарё вилояти кенгаши раиси, сенатор:
“Марказга кирганимиздан буён ҳайратимизнинг чеки йўқ. Биз дунёнинг турли мамлакатларида кўплаб музейларни кўрганмиз, аммо бу ерда ўтмишимизнинг буюклиги ва бугунги кунимизнинг улуғворлиги акс этгани — энг катта таассурот бўлди. Ота-боболаримиз тош давридан бошлаб яратган илм-фан, ҳунар, маданият намуналари замонавий технологиялар орқали шундай очиб берилганки, худди Улуғбек, Ибн Сино ёки Беруний билан мулоқот қилаётгандек бўласиз. Биз ҳар бир залга кирганимизда ўша даврнинг руҳиятини ҳис қилдик.
Бизнинг энг асосий хулосамиз — ёшлар бугунги кунда аждодларимизнинг қандай буюк мерос қолдирганини чуқур ҳис қилиб яшаши керак. Бунинг учун фақат китоб ёки дарс етарли бўлмайди. Мана шундай жой — тарихни кўз билан кўриб, ҳис қилиб, ичида яшаш имкониятини берадиган маскан жуда зарур эди. Бу ташаббус учун Президентимизга самимий миннатдорчилик билдираман. Чунки бу марказ нафақат Ўзбекистон, балки бутун дунёга халқимизнинг буюк ўтмишини кўрсатиб бераётган ноёб даргоҳга айланди. Бу ерга кўплаб давлат раҳбарлари, чет эллик делегациялар ташриф буюргани бежиз эмас”.
Депутатлар бу масканнинг ёшлар тарбияси, маънавий етукликни ошириш ва тарихий ҳаққониятни тўғри тарғиб қилишдаги улкан аҳамиятини алоҳида қайд этиб, Ислом цивилизацияси марказини янги Ўзбекистон маънавий юксалишининг муҳим пойдевори сифатида баҳоладилар.
Мухсин Ходжиев, Гулистон Давлат Университети ректори:
“Муҳтарам Президентимизнинг бу марказни яратиш йўлидаги меҳнатлари, ғоялари ва сиёсий иродаси натижасида бугун биз ўз тарихимизни янада чуқур англаш имконига эгамиз. Ишончим комилки, Ислом цивилизацияси маркази келажакда катта илмий мактабга айланиб, ёшларимизнинг билим ва дунёқарашини бойитишга хизмат қилади”.
Равшанбек Маҳмудов, Гулистон давлат университети профессори, депутат:
“Ислом цивилизацияси марказида биз жуда кўп янгиликларни кўрдик. Сомонийлар давлати, Кушон давлати, қадимий қўлёзмалар, тошбосма асарлар, нодир ҳунармандчилик намуналарини биринчи бор шу даражада яхлит ҳолда кўрдик. Ҳар бир экспонатнинг ўз моҳияти, ўз сабоғи бор.
Шу фурсатдан фойдаланиб, марказнинг барпо этилишида бош бўлган муҳтарам Президентимизга чуқур миннатдорчилик билдираман. Уларнинг меҳнатлари орқали биз бугун тарих билан юзма-юз турибмиз”.
Ташриф якунида делегация аъзолари кўрсатилган эътибор ва юксак ташкилий даража учун миннатдорчилик билдириб, Марказ фаолиятини юрт тараққиёти ва ёш авлод маърифати учун беқиёс аҳамиятга эга манба сифатида эътироф этдилар.